Chief Minister Lalduhoma’n kohhran leh pawl enkawl ruihhlo ngaite enkawlna hmunah thiam thil zirna an kalpui thei a nih chuan sorkarin tanpuina pek a huam thu a sawi.
Zirtawpni tlai khan chief minister leh Social Welfare Minister Lalrinpuii ten CMO-ah Mizorama ruihhlo hluar zel dona leh ruihhlo ngaite enkawlna chungchang sawiin an inkawm a. Chief minister chuan ruihhlo ngai enkawlna hmuna awmte an dam chhuah tak tak theih nan a enkawl zuina, after-care skill development ngaih pawimawh a tul thu leh Jordan Center pawh thiam thil an zir nghalna hmuna siam a that thu sawiin, hemi kawnga hma la nghal turin social welfare minister a chah.
Chief minister chuan TNT leh kohhranin a enkawl ruihhlo ngaite enkawlna, de-addiction center te pawhin thiam thil zir nghal theihna tur an kalpui theih dawn chuan a tul anga sorkarin tanpuina pek a inhuam thu a sawi a. Hemi kawngah hian social welfare minister chuan hma a lak nghal tur thu chief minister hi a hrilh a ni.
Chief minister leh social welfare minister te hian tun hnaia sawi hlawh tak, Sakawrtuichhuna |awngtai Bethel Camping Centre (TBCC) chungchang pawh an sawi dun a. Minister Lalrinpuii chuan TBCC hian sorkar kaihhruaina hnuaiah an enkawl zawh tawk damlote an lak a, mumal zawka kohhran leh khawtlang hruaitute nen thawkho chunga an kalpui dan tur a sawipui tur thu a sawi.
An inkawmnaah hian Social Welfare department hotuten ruihhlo do letna leh ruihhlo ngaite enkawl kawnga an hmalak mekna leh an hmachhawp te an sawi fiah a. Mizorama ruihhlo ngai enkawlna, Integrated Rehabilitation Center for Addicts (IRCAS) 11 te tihlenna turte, hetiang center la awm lohna district panga – Saitual, Khawzawl, Hnahthial, Lawngtlai leh Mamit a din vena tura Ministry of Tribal Affairs-a tanpuina awm theite zawn mek a nih thu te, Thingsulthliaha Multi-Disciplinary Treatment & Training Center din tur chungchang leh Jordan Center kalpui dan tur te an sawi a ni.
Zirtawpni chawhnu vek khan Social Welfare Minister Lalrinpuii hian kohhran hrang hrang hotute leh CYMA, MUP, MKHC, CCM aiawhte kawmin, The Mizoram Drug (Controlled Substance) Act, 2016 leh The Mizoram Drug Treatment-cum Rehabilitation Center Accreditation Rules, 2019 leh a hnuaia inkaihhruaina dan chu zawma center zawng zawng ten sorkara an inziah luh vek a tul thu a hrilh a. A inziak lutte chu sorkarin puih a tum dante leh ruihhlo ngaite enkawlna leh a invenna lama anmahni zawn theuh a tan la tura ngenin, thawhpuiah a sawm nghal.
Inkawmnaah hian kohhran hrang hrang hruaitute chuan ruihhlo hluar zel leh ruihhlo ngai pung zel chu pawi an tih thu leh an ngaimawh thu an sawi a. Ruihhlo ngai enkawl dam hi thil harsa tak anih avangin Pathian thu leh kohhran behchhana kal a tul thu leh a invenna lamah kohhran ten inzirtirna nasa zawka kalpui ni se an ti.