King of Pop, Michael Jackson (L)-a fanu chuan hun liam ta khan vawi tam intihhlum tuma a lo beih tawh thu leh tunah chuan mahni insitna nei tawh lovin, a nihna pawmin hun duhawm tak a hmang chho mek, a ti.
Paris Jackson (27) hian a thian leh musician ni bawk Willow Smith nena interview an neihah hun hmasa lama khawvel chhuahsan tuma a lo beih nasat dan te a puang chhuak.
Kum 2017 pawh khan Rolling Stone chanchinbu hmaah vawi tam intihhlum a tum tawh thu leh 2013 khan a tawp nan a beih leh thu a sawi bawk.
Smith nena ‘Red Table Talk’ an neih tumin Jackson chuan kum tam rilru hrehawm taka a awm dan te leh a talchhuah theihna tura tanpuina a hmuh dan te a tarlang a. “Mi tam tak chuan suicide an tum avangin inthiam lohna in an khat thin. Kei paw’n vawi tam ka tum a, tum loh tum pawh ka ngah tho. Ka pui tlin theih loh vang erawh chuan ka rilru a hah thei hle.
“Mahse, kum tam liam hnuah ka duh dan leh beisei tihpuitlinin a awm lo kha ka lawm hnuhnawh. Tunah chuan thil a tha lam zawngin a inher chho mek a ni,” a ti.
Engvanga mahni thu a khawvel chhuahsan tum thin nge a nih, tia zawhna chu, “Engkim mai hi niin ka hria. Ka nuna thil thleng hrang hrangte khan min nawr kal te pawh a tih theih ang. Hmeichhe naupang mai ka ni a, tleirawl kan han ni chho a, pressure nasa takin min umzui nghal a, a harsa ngawih ngawih,” a ti.
Hetih lai hian, cyberbullying chu a kaikuang pakhat lian tak nia sawiin, “Nitin tih mai tur hian mi chi hrang hrangin ‘Intihlum law law mai rawh’ tiin min hrilh a, depression nasa tak ka neih phah,” a ti bawk. Tumkhat phei chu intihhlum a tumna hi a tawpah chuan a hlawhtling ngei dawn tih hriatchianna chiang tak a nei nghe nghe.
“Ka bei nasa a, ka tum nasa bawk. Mahse, a tak ram ka thleng thei tak tak lo. ‘A la hun lo a ni ang’ te ka ti a, ka tawt ut ut thin. ‘Nghak leh phawt ang’ tiin ka inhnem a, khatih lai hun kha hun thim leh chhah tak a ni,” tiin a thil tawn sawichhuahna a nei.