Aizawl: All Mizoram Village Council Association (AMVCA) hruaituten Chief Minister Lalduhoma chu a pisa-ah kawmin village council dan thar a taka hman thuai a nih theih nan hmalakpui turin an ngen.
Zirtawpnia an inkawmnaah AMVCA hruaitute chuan chief minister hnenah VC-te lawmman tihpun a nih theih nana hmalakpui tur te, village council dan thar a taka hman thuai an ngen bakah, finance commission atanga VC-te hnathawh tur chungchang leh Mizoram kawngpui hrang hrangte chu furpuiah mipuiin harsatna an tawh lutuk loh nana hmalak vat a nih theih nan an thlen.
Chief minister chuan tun dinhmunah tihnghal rum rum theih nilo mah se VC-te lawmman chungchang chu a hriatthiampui thu a sawi a, a theih ang anga hmalakpui zel an nih tur thu a sawi a. Village council dan thar hi a taka hman vat a nih theih nana hmalakpui turin an thlen chungchangah chief minister chuan a changtu minister be nghalin chak taka lo bawhzui turin a hrilh a ni.
AMVCA hruaituten Mizoram House-a VC member-te thlen man tihhniam sak an nih theih nana hmalakpui tur leh Aizawl-ah VC-te khualbuk siam a nih theih nan hmalakpui tura an ngenna chu, chief minister chuan a pawimawh a tih thu lo sawiin, a hmunhma ngaihtuah vat nise hmalak zel a nih tur thu a sawi a bawk.
Chief minister chuan AMVCA hruaitute chu ram hmasawn nan thawhhona tha an mamawh thu a sawi a. Mizorama an member zawng zawngte hi mahni veng leh khua theuh a hnathawh uluk taka vil turin a chah a, hna chu tupawhin thawk mah se, ZPM sorkar hnuaiah chuan a tha tur a nih avangin hna tha lo chu a hnenah sawi zel turin leh action lak zel a nih tur thu a sawi.