Aizawl: MNF Adviser J Lalhmingliana, Wing Commander chuan tun sorkarah Civil Aviation lamah than beisei chi a nih loh thu sawiin, “A ngaihna thlawt an hre lo,” a ti.
Thawhtannia Mizo Hnam Runa chhung inkhawmah J Lalhmingliana chuan, Lengpui Airposr bul tantu tak tak chu chief minister hlui, MNF founder President Laldenga a nih thu sawiin, “MNF sorkar lei 1987-a survey team a din atanga lo intan a ni a, kei pawh team leader-ah min dah ve nghe nghe a. Hemi tum hian thla ruk chhunga report pe tur kan ni a, Lunglei Kawmzawl-te pawh kan en nghal nghe nghe a ni,” a ti.
J Lalhmingliana chuan, “Pu Laldenga khan Rajiv Gandhi hnenah Mizoram-in Airport thar kan neih theih nan nasa takin a sawi a. DO letter te pawh a ziak a, hmuh tul ang ang Minister dangte pawh a dawr bawk a ni. Chumi kal zelah chuan 1991 khan Mizoram Airport survey tur tak takte an lokal kal ta a ni,” a ti.
MNF Adviser chuan, “Lengpui Airport hi 1995-ah sak tan theihin sum a awm ta tih a sawi a. Kum 1996-ah sak tan niin, December 12, 1998-ah MNF sorkarna hnuaiah hawn a lo ni ta a ni,” tiin, a bul tantu MNF hunlai bawkin Lengpui Airport hi hawn a nih thu a sawi.
Air Force-a kum 23 a lo thawh tawha a tawnhriat atangin Indian Air Force kuta Lengpui Airport hlan tum hi thil tih chi a ni lo tih chu a ngaihdan a nih thu sawiin J Lalhmingliana chuan, “Airport hi intawm chi a ni lo. Air Force leh Civil flying a inpawlhna reng rengah Civil an insawn chhuak zel a ni. IAF kuta kan airport kan hlan chuan kumkhuaa kan inchhirna tur a ni ang,” tiin, ralthuam famkim nena inthuam, hman phalna nei bawk si nena thil intawm chu tih chi a nih loh thu leh a zir chiangtute hian an zirchiang tawk loh thu a sawi bawk.