Aizawl: Congress party-a Research Cell Chairman T Sangkunga, ex-MLA chuan Congress sorkar kha Zoram mipuiin kil tinah an ngai nia a hriat thu a sawi.
Nimina Congress Bhavan-a inkhawmah T Sangkunga chuan, India rama politics lian ber chu leitha a ni tih a sawi a. Union budget pharhah fertilizer-ah subsidise a awm em tih en nghal a ni thin a. Mizoramah chuan subsidy a awm tawh si lo va, leitha te a to in an lei a, loneitute an mangang tih sawiin, “Lei thaah ringawt pawh hian loneitute hian Congress min au a ni,” a ti.
ZPM sorkarah sorkar hnathawkte an inchhirin a hriat thu a sawi a. Ran vulhtute pawh an mangang a, ran chaw an ti to chak lutuk a, bawnghnute man hi MULCO in a sang zawngin an ennawn ngai si lo, an ran te talh mai an hmabak nia an sawi thu a sawi.
T Sangkunga chuan tuna an kalhmangah sorkar hnathawk an ni emaw loneitu, sumdawng an ni emaw pawisa leng vak a tlem tih sawiin, “Sum leng vak tlemah harsatna namenlo kan tawk mek a, kan la tuar dawn chauhin a lang,” tiin, pawisa leng vak awm lo lutuk hi ram tan a that loh avangin, mipui leh sorkar hnathawkte hian Congress sorkar leh hun nghakin an au niin a sawi.