Kan thenawm ram leh state thenkhatah tualchhung buaina hrang hrang a awm a, sahimna zawngin thenkhat an rawn tlanchhe bawk.
Myanmar lam atangin tam tak an rawn raltlan a, Bangladesh lam atangin an rawn tlanchhe bawk. Manipur buaina avanga rawn raltlante an awm nual tawh bawk a nih kha.
Hetiang hi kan dinhmun a ni a, kan ram chhungah duh thalin an rawn khawsa a, kan tih ngai loh leh chin ngai loh, kan rama thleng tura kan rin loh tam tak an rawn thlen a, enzui leh vil zui an ngai ta hle.
Raltlante hi a zawng zawng chuan an sual bik hauh lo. Ram dan leh dunte zawm a, fel taka khawsa an awm laiin ruihhlo kaihhnawih leh khawtlanga sualna thlen zawnga rawn khawsa an awm leh thin erawh hi chu enzui an ngai tak zet.
Kan huan leh lo rama rawlrala che duh an awm a, a ruka thiltih ching an awm mai bakah, ruihhlo hmanga sumdawng thlengin an awm chho niin a hriat a, eizawnna kawng dang nei lo ta chu hmun thenkhatah chuan hnawksak fe fe an lo awm thei dawn khawp mai.
Heti reng hi kan ni thei dawn lo a, sorkar hian raltlante enkawl leh vil zui dan tur hi ruahmanna siam thuai thuai se la, mipuiin a felte thlenga kan hmuh mawh mai hi a hlauhawmin, inkaihhruaina tha kan siamsak thuai an ngai e.