Aizawl: BJP Mizoram State Core Group member Dr K Beichhua, MLA chuan Sethawn-a ruihhlo ngaite enkawlna hmun changtlung tak dina hma an lak tawh sa chu ZPM sorkarin hmala chhunzawm duh loah a puh.
Thawhtannia BJP Mizoramin an pisa-a inkhawm an neihah thu sawiin Dr K Beichhua chuan sorkar hmasaa social welfare minister a nih lai khan Sethawnah 1,000 leh theihna tur, biak in pahnih leh damdawi in bakah ruihhlo ngaihna atanga an chhuah huna an tangkaipui tur, skill development training centre pawh Thingdawlah an din a. Hetah hian trade hrang hrang zir theihna a awm dawn bawk tih sawiin, “Mahse, heng hi ZPM sorkarin hmalak zui ahnekin tunah hian mi mal enkawl thei tur a zawng a, a hmu thei si lo. Tun hnai Tawngtai Bethel Camping Centre (TBCC)-a thil thleng han hriat leh phei chuan kan sorkar hi innghahna tlak, thlamuanpui tlak niin a lang ta lo,” a ti.
Siaha bialtu MLA chuan Mizoram hian tunah chuan social security hi ngaih pawimawh tak tak a ngaih tawh thu sawiin, “Kan social security hi a chhe hle. Tunah hian Aizawl dinhmun kan ngaihtuah hian kan nula tlangval tam takte ruihhlo bawihah an tang mek a. Hei hi kan sorkar hian an ngaihthah hlein a hriat a, a pawi tak zet a ni,” tiin, chief minister-in an sorkar hma khan UNO hriatpuia ruihhlo ngaite enkawlna tur hmun lian ber pawl din a tum kha tun thlengin hmalakna mumal a nei lo chu vanduaithlak a tih thu leh tunah hian UNO hriatpui lem loh tal pawh thalaite chhanchhuahna tur atana hma la tura a chah thu a sawi bawk.