Aizawl: India rama sorkar damdawi in tha tehnaah Mizoram sorkar damdawi in panga an tling thar.
Dr. Lily Chhakchhuak, Mission Director, NHM, Health & Family Welfare Department atanga thudawn danin, India rama sorkar damdawi in tha bik tehna, National Quality Assurance Standards (NQAS)-a tling tharte hi State Referral Hospital, Falkawn leh PHC pali – Chhipphir PHC, Phuldungsei PHC, West Phaileng PHC, leh Bilkhawthlir PHC te an ni.
NQAS-a tehnaah State Referral Hospital, Falkawn (Aizawl West District Hospital / ZMC&H) chuan zaa 92.89 a hmu a. Hospital pumpui anga NQAS certification an hmuh bakah hian, nau neihna hmun tha bik tehna (LaQshya)-ah Platinum Certificate hmuin, Maternity OT bikah zaa 98.26 a hmu a, Labour Room-ah zaa 92.88 hmuin, naupang enkawlna hmun tha bik tehna, MusQan certificate pawh zaa 92.80 a hmu a ni.
Primary Health Centre zinga NQAS-ah hian Chhipphir PHC in zaa 92.48, Phuldungsei PHC in zaa 91.27, West Phaileng PHC-in zaa 89.47 leh Bilkhawthlir PHC in zaa 94.94 an hmu a ni.
Heti hian Mizorama sorkar enkawl damdawi in 19-te chu NQAS national certificate nei tawh an ni a. Tunah hian sorkar damdawi in 24 dangin state level certificate nei tawhin, national certificate hi an dil mek bawk.
Health Minister Lalrinpuii chuan, ram chhunga damdawi in tha bik thlan chhuah zingah Mizorama damdawi in an awm belh zel chu Mizoram tan mellung pawimawh tak a nih thu a sawi a. Damdawi ina thawktu zawng zawngte thawhrimna leh taimakna chhuanawm a tih thu sawiin, heng tehnate hi sorkar damdawi in pantu damlote chu a chhawr tangkai bertu tur an nih thu a sawi.