Social Welfare Minister Lalrinpuii chuan sorkarin dan a neih zawm lo tan ruihhlo ngaite enkawlna hmun centre din emaw, kalpui emaw phal a ni tawh dawn lo niin a sawi.
Thawhtanni khan a pisa-ah thu thar thehdarhtute kawmin social welfare minister chuan sorkarin dan a neih, The Mizoram Drug (Controlled Substance) Act, 2016 leh The Mizoram Drug Treatment cum Rehabilitation Center Accreditation Rules, 2019 (and its subsequent amendments) hnuaiah, drugs de-Addiction center/rehabilitation center-te hian sorkarah accreditation an tih vek a ngai tawh dawn tih sawiin, “He dan hnuaiah hian infrastructure, human resource, service, documentation etc-ah minimum standard siam niin, hetiang zawm lo chu center din emaw, kalpui phal a ni tawh lo ang,” a ti.
Lalrinpuii chuan accreditation hi centre-te tihtawp tumna ngawr ngawr a nih loh thu sawiin, “Centre-ten rualkhai zawk leh ruihhlo ngaiten enkawlna an mamawh ang tak an dawn theihna tura awmze nei taka enkawlna kalpuina tur a ni zawk a ni,” a ti.
Sorkar chuan centre dina an theih leh phak ang tawk tawka enkawlna lo kalpuite inpekna pawh a hriatpui tel bawk tih sawiin social welfare minister chuan, “Heng center ding sate hian awmze nei taka enkawlna an kalpui chhunzawm theih nan kawng hrang hrangin puihna pek a inhuam thung a ni,” tiin, sum faia tanpuina bakah service pawimawh bik pekte pawh a tel dawn niin a sawi.
Social welfare minister chuan sorkar enkawl ruihhlo ngaite enkawlna thin, Sethawn-a Jordan Centre chu after-care skill development center atan kalpui tura ruahman mek a nih thu a sawi a. Hemi kawngah kohhran lamten enkawl hna hi an thawk thei em tih an zawt mek a, an kalpui theih loh chuan sorkarin enkawl hna a chhunzawm dawn tih a sawi.
Lalrinpuii sawi danin, social welfare department-in a hriat theih chinah tun dinhmunah hian Mizoram-ah ruihhlo ngai enkawlna 46 a awm mek a, heng zingah hian 11 chuan Ministry of Social Justice & Empowerment (MOSJE) atangin tangpuina fund an dawng thin a. Tunah hian ruihhlo ngaite enkawlna hmun awm lohna district panga – Saitual, Khawzawl, Hnahthial, Mamit leh Lawngtlai-ahte centre dinna tur hi project proposal Ministry of Tribal Affairs-ah thehluh mek a ni a. Multidisciplinary & Research Center hi PISGAH, Thingsulthliah-a dinna tur leh Jordan Center bula sorkar ram awla de-addiction center lian zawk dinna tur hi Ministry of Tribal Affairs-ah hian thehluh a ni bawk.
Mizorama kohhran pali – PCI, BCM, ECM leh LIKBK ten an enkawl mek center-te hi after care skill development course-te nei tel nghal tura ngen an ni a. Anni hian hetianga an kalpui theih chuan sorkarin tanpuina pek a inhuam a ni.