Aizawl: Chief Minister Lalduhoma chuan ZPM sorkar hnuaiah sorkar hna lakah a thiam leh tlingte chauh an la zel dawn tih a sawi.
Nimina ZPM party pisa-a inkhawmah thu sawiin chief minister chuan ZPM sorkar hnuaia hnathawh reng reng a tha tur a ni tih sawiin, “Mipuiin beiseina sang tak nen min thlir a ni tih hriaa contract hna a ni emaw, MLA fund hmanga hnathawh emaw reng reng kalphung thar, mipui sorkar hnuaiah chuan a tha bik tur a ni,” a ti.
Hmasawnna hnathawhte hna endiktu tur, party hrang hrang awmna, Mizoram State Monitoring Committee an din tih sawiin Lalduhoma chuan, “Anni hian rim takin an thawk mek a, hna tha lote chu a tul anga action lak a ni a, kan la zel bawk dawn a ni. Sorkar hna lak chungchangah pawh a thiam leh tlingte chauh kan la zel dawn,” tih sawiin, thalaite chu taima taka lehkha zir tur leh thiamna tak tak neia ram tana mi chhenfakawm ni turin a chah.
Lalduhoma chuan, Mizoram mipuiin sorkar thara rinna leh beiseina thar an nei chu lawmawm a tih thu a sawiin, “Hei hian chakna min pe thin a ni,” a ti a. ZPM hotute chu mi famkim lo ni mah se, amah leh a thawhpuite nen theihtawp chhuahin ram tan chawl lovin hna an thawk mek a, ramin hmasawnna hmel thar a hmu chho mek hi lawmawm a tih thu a sawi.
ZPM chu ram rorelnaa Pathian ram tundin tumtu party an ni tih sawiin, tlang hrang hranga an lungrualpuite pawhin rilru thianghlim leh ram hmangaihna thinlung chhawm nung zel turin chief minister chuan a chah a, an party lo hi Zoram mipuite hian innghahna an nei tawh lo tih hria a, an awmna hmun theuhah thahnemngai taka ram tana thawk zel turin a chah bawk.