AZL: Aizawl South I bialtu MLA C Lalsawivunga’n nimin khan a bial chhunga HSSLC top 10-a tlingte lawmpuina hun a pisa-ah a buatsaih.
C Lalsawivunga chuan MLA dinhmun a chelh tirh atanga tun thlengin Mizo thalaiten central service-a luh duhna thinlung an put theihnan theihtawpa a au thin thu sawiin, “Hei hi kan ramin a mamawh lian tak leh kan tlakchham mek a ni,” a ti.
Bialtu MLA chuan tun hmain central service-ah Mizo thalai chhuanawm tak tak an lut thin a, chungte chuan state leh central sorkar indawr tawnnaahte, state chhunga sorkar hna pawimawh chelh kawngahte an thawhhlawk thin hle a, ramin a tangkaipui em em thin a ni. Hun a lo inher zela central service-a lut mi hmasate an lo pension zela, mi thar lut an awm ta meuh si lo, state chhunga sorkar hna sang leh pawimawh tam takah hnam dang an awm a ngai ta deuh zel mai a, hei hian rilru a kap thin avangin, Mizo thalaite an thangharh a tul thu a sawi.
Aizawl South I atanga pawl 12 result chhuaka top 10-a tling mi pathum hnenah C Lalsawivunga hian lawmpuinan laptop a hlan a ni.