Union Minister of State for Skill Development and Entrepreneurship Jayant Chaudhury chuan sorkar laipuiin hmarchhaka thalaiten thiamna leh theihna sang tak an neih a nih tur anga cho chhuak turin a bik taka hmalak tul an tih thu a sawi.
Sorkar laipui Ministry of Skill Development & Entrepreneurship hmalakna hnuaia hmarchhak state hrang hranga thalaiten eizawnna tlak thiamna chi hrang hrang an neih theihna tura a bik taka hmalakna atana bul tanna, ‘Advancing Apprenticeship in the Northeast Region’ hawnna inkhawm, ATI Auditiorium-a buatsaih a hmanpuinaah union minister chuan hmarchhak state-ah thiamna leh theihna a awm bakah, thalaiten theihna sang tak an nei tih sorkar laipuiin a hriat thu a sawi.
Union minister chuan data an neih atanga an en hian hmarchhaka thalaite theihna hi a nih tur angin an la cho chhuak lo tih an hriat avangin, a bik taka hmalak a tulin sorkar laipui chuan a hriat thu a sawi a. Hei hi prime minister pawhin a ngai pawh hle tih a sawi a. Amah ngei pawhin he hmalakna hi uluk taka a vil reng dawn thu leh a regular taka review meeting neih a nih thin tur thu a sawi.
Choudhury chuan skill development leh entrepreneurship sector-ah India ram hmun dang aiin hmarchhak state-ah hmeichhiate an tel tamin an chet thatna avangin an entawntlakin, hei hian phurna leh chona nasa tak a pek thu a sawi bawk.
Chief Minister Lalduhoma pawhin thu sawiin, Mizoram mipui zaa 60 chu thalai, kum 35 hnuai lam an ni a, kaihhruaina tha leh dik nena hmalak a nih chuan Mizoram mai ni lo, India ram economy than zelna kawngah pawh an thawhhlawk thei hle dawn niin a sawi.
He hunah hian National Skill Development Corporation (NSDC) leh Welspun Living Limited (WLL) ten Textile sector-a hmarchhak thalai 1,000-te thiam thil zirtir bakah, hna an hmuhsakna tur atana inremna (memorandum of understanding) ziahna an inthleng tawn bawk.
Inkhawmah hian Home Minister K. Sapdanga, LESDE Minister Lalnghinglova Hmar, Nagaland MLA Moatoshi Lungkumer, Advisor, Labour, Employment & Skill Development ni bawk bakah MSDE hotute leh hmarchhak state hrang hrang atangin thalai thahnem tak an tel a ni.