Aizawl: Mizoram Larsap General Vijay Kumar Singh chuan vohbik naupangte enkawl kawngah inchhung khura inenkawlnain awmze thui tak a neih thu a sawi.
Thawhlehnia Ephatha Special School for the Deaf and Hand of Hearing (ESOMDHH)-in College Veng, Aizawl-a an dinchampha vawi 9-na an lawmna hmanpuitu larsap Gen. Vijay Kumar Singh chuan vohbik naupangte enkawl kawngah inchhungkhura inenkawlnain awmze thui tak a nei tih sawiin, “Hmangaihna leh an laka beiseina sang tak chuan naupangte chakna a pe a, harsatna paltlangin duhthusam an thleng thei thin a ni,” a ti.
Larsap chuan nu leh pate chu fate hmalam hun atana mi pawimawh bik an nih avangin zirna tha an dawn theih nana theihtawp chhuah turin a chah a. Sorkarin mi tin huapzo zirna a kalpui mek hnuaiah zirna tibahlah thei ang chi reng reng a awm loh nana hmalak a nih thu sawiin, hemi kawnga ESOMDHH-te hmalakna chu mi tin huapzo zirna a taka tichiangtu a nih thu a sawi.
Inkhawmah hian ESOMDHH President Saihmingthangi; Principal Samuel R. Lalhmangaiha leh Senior Adviser Laldikkimi te’n thu an sawi bawk.
ESOMDHH hi May 11, 2016 khan din a ni a. Tun dinhmunah Principal pakhat, zirtirtu panga, Craft teacher leh volunteer pakhat ve vete’n zirlai 24 an enkawl mek a. Class I atanga VIII thleng zirna awmin, Indian Sign Language (ISL) hmanga zirna kalpui a ni a. School dintu ESOMDHH hi bengngawng leh ri hriatna tha lote hamthatna ngaihtuahtu society ni turin February 28, 2012 khan din a ni.