Aizawl: Buichali leh Sairang inkar kawngah hmun 20 dawn laiah truck lian tana zawh harsa khawpa chhia a awm tih hmuh a ni.
Nimin khan PWD Minister Vanlalhlana hovin Buichali leh Sairang inkara kawng chhe zual lai te chu Public Works Department (PWD) hotute, National Highways and Infrastructure Development Corporation (NHIDCL) a thawktute, Mizoram Truck Owners Association (MTOA) leh MTDA aiawhte nen an enfiah.
PWD Minister chuan NH06 chu Mizoram chak lakna kawngpui pawimawh ber zinga mi a nih angin, engtik lai pawha lirthei zawh tlaka siam a tul thu a sawi a. NHIDCL hotute chu mipui, a bikin lirthei hmanga eizawngten harsatna an tawh dante hrilhfiahin tun aia chak lehzuala kawng siam hna kalpui turin a chah.
NHIDCL, MTOA leh MTDA te chuan May 23, 2025 atanga sawt lehzuala kawng siam hna kalpui a nih theih nan inrawnkhawmna an neih tur thu an sawi ho.
Lirthei neitu aiawhte hian chak zawka kawngpui siam a nih theih nan kawng siam chhung, zing dar 9 atanga tlai dar 5 thleng lirthei din tir an inhuam thu an sawi bawk.
Minister hi Er. Robin Lalrinawma, Chief Engineer (Highways), Binod Kr. Srivastava, PMU Kolasib GM (P)-te bakah MTOA leh MTDA Office Bearer thenkhatin an tawiawm a ni.