Aizawl: Power & Electricity department chuan sorkarin electric bill a tisang lo tih sawiin, sorkarin electric bill tisang anga social media-a mi thenkhat thu thehdarh chu thu dik tawk lo a nih thu an sawi a; chi-ai lo turin mipui an chah.
Thuchhuah an siamah P&E department chuan, tun hnaiah mi thenkhatin subsidy tel lo rate (Un-Subsidized rate) hmanga electric bill chawi tur zat chhut chhuahna siamin, social media-ah mipui ti chiai thei zawngin electric bill chu sorkarin a tisang angin thu an theh darh chu thu diklo niin, sorkarin electric bill a tihsan loh thu an tar lang.
P&E dept chuan sorkar chu langtlang a nih theih nan sorkarin mipui tana electric bill a pek sak zat (electric bill subsidized) mipuiin an chhut chhuah ve theihna tur bill body-ah ti lang ngei turin P&E Department hriattir mah se, May thla bill form chu print lawk sa (Pre-printed) anih avangin subsidy tarlanna tur column a la awm lo va, chuti chung chuan mipuiin sorkar atanga electric bill subsidy an dawn zat an lo hriat ve theih nan slab rate zawnah hian subsidy tello rate (un-subsidized rate) tarlan niin, he rate hi mipui chawi tur zat rate a nih loh thu an sawi.
Mipuiin electric bill an chawi tur dik tak rate chu bill body hnung lamah tarlan tho a nih avangin, sorkarin electric bill a tihsan loh thu leh chi-ai lo turin mipui an hriattir tih an sawi bawk.