Thawhtanni atang tawha French chhim lama ruahpui vanawn sur avanga tui lianah mi pathum vel an thi tawh.
Nupa tuak upa tawh tak chu tuipui kama chawlh hmanna khua, Le Lavandou-ah an ruang hmuh a ni a, mi dang pakhat pawh Vidauban-ah a car chhungah tui lianin a dan avangin a thi tih Thawhlehni khan thuneituten an sawi.
Ruah hian chhiatna a thlen nasa hle a, khawlaiah tui a tling a, power leh tui a awm lo bawk a. Region pahnihah rel kawng a chhiat avangin relte chu Thawhtanni zan zankhua khan che thei lovin an awm.
Nupa thite hi tuiin an chenna a chim avanga tlan chhiat tum, tuiin a lak tak an ni a, ‘tui chim chin sang chak lutuk chu a mak tak zet’ niin Toulon public prosecutor chuan a sawi.
He thihna thleng hi chhui zui mek a ni.
“Tukina Cavalière district-a khuarel chhiatna thleng hian mi a barakhaih hle a ni,” tiin Le Lavandou-a thuneitute chuan an sawi a. An khaw laili chu darkar khat lek chhunga ruah mm 256 zet a sur hnuah tuiin a chim pil vek a ni.
He khua hi St Tropez atanga khawchhak lam km 30 chauhva hla niin French Riviera-a chawlh hmanna hmun lar tak a ni.
“A thawk nain a rapthlak tak zet a ni,” tiin Mayor Gil Bernardi chuan a sawi a, “Kawngte pawh a khawk nasa a, leite pawh a bung remrem a ni,” a ti.
Le Lavandou-ah hian Thawhlehni thleng khan electricity leh tui lak an la nei mang lo va, an khuaa kawngpui ber pawh tuiin a la chim bawk.
Hetih lai hian hmar lam deuhva Vidauban-ah hian tuiin kawngpui a chim laia car khalh lut, khuara tang zui taah mi pakhat a thi.
A bul hnaia miten a khalhtu leh a mi phurh chu chhanchhuah tumin an bei a; mahse, a khalhtu chauh hi an la chhuak thei niin Vidauban khaw mayor, Claude Pianetti chuan a sawi.
Thawhtanniah ringawt khan Var region-ah chuan rikrum a thlen avanga emergency services kohna vawi 500 chuang a awm hman niin thuneituten an sawi a. Chhanchhuah hna thawktu pawh tam tak tirh chhuah an ni a, a bul hnai khua, Cannes-ah pawh tirh an ni.
Var hi Thawhlehniah pawh khan ruah thawka tui la lian thei nia sawi a ni a; mahse, engmah hlauhawm tham a thawk zui ta lo hlauh thung.
Tual chhung thuneitute chuan chhungkaw 600 chuangin electricity an la nei lo tih an sawi.
Thawhtanni zanah khan France chhimchhakah ruahpui leh rial a tla chiam bawk a. Bordeaux-Toulouse railway line chu tibuaiin rel thenkhat chu a tuka zin tura tihkhawtlai a ni.