Aizawl Zarkawt vengah tu tih hriat lohin khawlaia nausen thla khat mi vel a dah chu chhar a ni a. Nausen kalsantu hi Police-ten chhui nghalin, he thu buatsaih lai thleng hian hmuh a la ni lo.
Thudawn danin, Nilaini khan Zarkawta Dominos dawr kawt step-ah, nausen hmeichhia thla khat mi bawr vel chu chhar a ni a. A dahtu hi hriat mai a ni lo va, police-ten dawr hrang hranga CCTV atanga an chhui zui hnuah nausen hi hmeichhe pakhatin a dah a ni a, a dahtu hi a hmel erawh hmuhchian theih a nih loh avangin tunge a ni tih hriat theih mai a la ni lo.
Police-ten an chhui zui zelnaah, tu tih hriat loh hmeichhia hi Lunglei Sumo Service atanga Aizawl pan niin, sumo khalhtu pawh hian tunge a nih a hre bik lo va, police-te’n ngawrh takin an chhui zui mek a, he chanchin buatsaih lai thleng hian hmeichhia hi tunge a nih hriat a la ni lo.
Thudawnnain a sawi danin, nausen hi Durtlanga Hmangaihna Inah dah a ni a, a hriselna dinhmun pawh a tha a ni.