Maharashtra-a Kalyan-ah in lian tak peng thenkhat chim avangin naupang telin mi paruk an thi a, mi dang parukin hliam an tuar bawk.
Kalyan East-a Thawhlehni chawhnua chhiatna thlengah hian kum 35-a upa in, Saptashrungi an tiha chhawng lia chhawng hnihna chhuat chu a chim thut a ni.
He in hi siam that leh chei hnum hna thawh lai mek nia sawi a ni a, ‘lehkhakhawng remkhawm chim ang maiin’ a chim darh niin an sawi a, a chhehvela awmte a chiai hle.
Tual chhung miten police leh fire brigade an hrilh nghal a. Chhanchhuah hna pawh fire department, TDRF, police, tual chhung rorel khawl aiawh leh inpeten an thawk zui nghal a ni.
Kalyan Dombivli Municipal Corporation (KDMC) Commissioner Abhinav Goyal chuan chhiatna thlenna hmunah hian fire department, Thane Disaster Response Force mite, police leh tual chhung rorel aiawhte an tlan khawm nghal thu a sawi.
“Mi 12 hima lak chhuah an ni a, hetih lai hian vanduaithlak takin mi paruk erawh an thi a ni,” tiin commissioner chuan a sawi.
Chhanchhuah hna hi darkar li dawn thawh niin mi tangte lak chhuah kim an ni a, hliam tuarte pawh Rukmanibai damdawi inah lak nghal an ni bawk.
“Mi chengte chu furpui lo thleng tur leh hetiang thil thleng thut thei lakah an chenna a him em tih thlithlai uluk tura hriattirna pek a ni a. Chhiatna lian zawk a thlen loh nan a tul chuan insaseng lawk mai turin kan ti a ni,” tiin commissioner chuan thuthar lakhawmtute a hrilh.
Thi zingah hian naupang a tel a, hliam tuar zingah hian naupang kum 13 mi leh a aia naupang pathum an tel a. Naupangte hi an dinhmun pawh a tha vak lo nghe nghe.
He chhiatna thleng avang hian mi tam tak chuan in enkawl uluk tawk lo leh thuneitute pawh dan kenkawh kawnga chak tawk lo anga puhna thawm a rik rin phah hle.