MZP chuan zirtirtu aikal late March thla chhunga an hnena report tura thu an chhuahah district paruk atangin mi 22 report an dawng tih sawiin, tun thlenga zirtirtu aikal la te chu June 13, 2025 ral hma ngeiin sorkarin an chungah action lak an phut.
Nilainia MZP Pisapuia thu thar thehdarhtute kawmin MZP hruaitute chuan, sorkarin aikal la titawp tura hma a lakna chu an thlawp thu an sawi a. MZP pawhin zirtirtu aikal late chungchang veiin, January 23, 2024-a MZP Executive Meeting-in chuan February 10, 2024 ral hmaain an hnenah zirtirtu aikal la tur report turin hriattirna chhuah mah se, sorkarin aikal lak chungchangah hma a lak mek avangin thlithlai reng chunga ngaihchan zui a ni ta rih tih an sawi.
Sorkarin nasa takin a bei zui a, Mizoram Legislative Assembly thutkhawmah pawh sawi a hlawh a. Sorkar sikulah aikal lak hi tihtawp a nih tawh thu pawh sawi chhuah a nih laiin, sorkar hmalakna zawm duhlo leh ngai pawimawh lo an awm ngeia sawi a nih hnuah, March 18, 2025 khan MZP Executive Committee meeting chuan zirtirtu aikal la tihtawp a nih theih nan MZP rorelna sang Federal Council Sitting Agenda atan pawmin, March thla chhungin zirtirtu aikal late an hnena report tur neite tan phone number tarlangin, flyer te an thehdarh a. Hemi atangin nimin thleng khan district paruk atangin sikul 14-a thawk, mi 22 aikal la report an dawng tih an sawi.
MZP chuan zirtirtu aikal laite an dap tih an hriat avanga aikal la ngam lote, report an dawn hnua aikal la ngam tawh lo, lo thawk lehte pawh an awm tih an sawi a. Tuna an thusawi avanga, aikal la si thawk leh pawh an awm ngei an ring tih sawiin, May 2, 2025-a MZP Federal Council Sitting in zirtirtu aikal late lakah sorkarin action a lak theih nan MZP in hma la rawh se tiin a rel angin, June 13, 2025 ral hma ngeiin aikal la te lakah hian sorkarin action a lak ngei an phut tih an sawi.