Aizawl: Social Welfare Minister Lalrinpuii chuan ruihhlo ngai enkawlna hmun pahniha an hotute chu a pisa-ah kawmin, sorkarin center-te training pekna kawng hrang hranga puih a tum thu leh kohhrante pawh puitu tura sawm an nih thu a sawi.
Nilaini khan Social Welfare Minister hian Phungchawnga inbengbel, Operation Kingdom Ministry hotute chu kawm hmain, hemi hnu hian Tawngtai Bethel Camping Center (TBCC) dintu Zohmingthanga leh TBCC Advisory Board hotute a kawm bawk.
Center pahnihte a kawmnaah hian Lalrinpuii chuan, dan angin Addiction Center/Rehabilitation Center-te hian sorkarah accreditation an tih vek a ngai tawh dawn a, dan hnuaiah minimum standarh zawm tur awmte an zawm theihna’n sorkarin center-te training pek a, kawng hrang hranga puih a tum thu leh kohhran hrang hrang hruaitute pawh puitu tura sawm an nih thu center pahnih hotute a hrilh.
OKM hotute nena an inkawmnaah, dan hnuaia inkaihhruaina mumal tak nena kal a ni tur chu lawmawm an tih thu leh, sorkar, kohhran leh NGO te nena thawhho chu an duhthusam a nih thu an sawi.
TBCC dintu Zohmingthanga leh TBCC Advisory Board hotute nena an inkawmnaah hian TBCC tha zawk, langtlang zawk leh inkaihhruaina mumal zawk nena kalpui dan tur an sawiho a. TBCC lam pawh hian dan hnuaia mumal taka kal chu an duhdan anih thu leh lawmawm an tih thu an sawi a. A rang thei ang bera tuna ruihhlo ngai hawna tur nei lova khawlaia tei rawlaite lo enkawl leh turin TBCC hi ruahmanna siampui an ni.
Admission mumal zawka tih leh a hmun hmain a zawh tawk dam lo la turin an inruahman dawn a. TBCC advisory Board Vanhela Pachuau Chairman-na hnuaiah uluk zawkin an vil tawh dawn a ni.
OKM hi Firms & Societies Act hnuaiah inziak lutin mi inphalte thawhlawm pek khawm atangin kal an ni ber a. Ruihhlo ngaite Pathian thu zirtirna an kalpui a, thla 7/8 te an course hi a ni thin, tunah hian mi 400 an awm mek a ni.