Sports & Youth Services Minister Lalnghinglova (Tetea) Hmar chuan Nilaini khan May 4-15, 2025 chhunga Patna, Bihar-a Khelo India Youth Games-a Mizoram atanga medal latute lawmpuina hun a hmang.
Khelo India Youth Games 2025-ah khan boxing-ah Samuel Zadeng chuan gold medal a la a, football (boys)-ah bronze medal lak a ni bawk.
A pisaa medal latute lawmpuinaah hian minister chuan, “Sports hmasawnna chu sports person-ah a lang tur a ni a, medal lak dan zel an en avangin medal lak hi a pawimawh a ni,” a ti.
“Mizoramin gold medal kan la tih ka hriat khan ka lawm hle a, a chhan chu national level-ah chuan medal lak hi thil harsa tak a ni,” a ti bawk.
Tetea Hmar chuan, “Samuel-a’n gold medal a la hi ka lawm tak zet a. Boxing phei chu state dang atangin khel an tam a, inelna a san avangin national champion nih a har hle,” a ti a. “Football-ah hian medal hi kan la tluang pangngai thei viau a, hengahte hian player-te leh coach-te inpekna a fakawm,” tiin a sawi bawk.
Bawngkawn Brigade rawlthar, Samuel-a hi kg 65-70 huangah khelin final-ah Uttar Pradesh boxer Praveen Yadav chu 5-0 in a hneh a ni.
“State dang kan phak lohna thin, san zawng leh ban thui zawngte Samuel-a hian a nei tha a, theihna sang tak nei niin national level chauh ni lovin Asia leh a aia sang pawh thleng zel thei a ni,” a ti a, sang tak thleng tura tun aia nasa a thawkrim turin minister hian a chah.
Samuel-a chuan inelna a hmachhawna a thil tawn sawiin, “A tan tirah taksa lamah harsatna nei mah ila ka chak thei zel a. Coach-te leh team official-ten min pui nasa a, tactic leh gameplan tha tak min siamsak zarah tluang takin ka chak zel thei a ni,” a ti.
Gold medal latu, Samuel-a hnenah hian boxing infiamna bungrua hlan a ni a, minister hian ama mi mal pawisa a pe bawk a. August 29-a Incentive Cash Award sem hunah medal late hi sorkar atanga pawisa fai hlan leh an ni ang bawk.
Sports & Youth Services hotute pawhin thu sawiin Mizoram infiamnaah player thate sang zawk thlenpui zel turin coach-te pawhin hmasawn tura tan an lak a ngaih thu an sawi.
Khelo India Youth Games 2025 ah hian Mizoram atangin infiamna chi sarihah infiammi 34 leh a hruaitu mi 10 an tel a, state leh UT 36 intihsiak zingah 26-na an ni.
Kuminah hian E-Sports chu demonstration sports-a telh thar a ni a, Mizoram atang pawhin mi 13 an tel.