Aizawl: MPCC Sr Vice President Lalnunmawia Chuaungo chuan ZPM sorkarin mipui sum an chawm a, an hawp bawk laiin mipui thleng phak sum lengvak a tlem avangin rukruk, in rawk, ruang chhar, ruihhlo tawlh leh mahni taksa langsar taka zawrh nasa takin a hluar mek tih a sawi.
Ningania Serchhipa Congress party hruaitute nen an inkawmnaah MPCC Sr Vice President Lalnunmawia Chuaungo chuan, tun laiin Mizoramin sum a harsa a. Sorkar pawhin tihngaihna tak hre lovin puk tur zawn chu a hna ber a nih laiin, ZPM sorkar chuan ‘kan ti ve lo vang’ an tih zawng zawng ti vekin mipui sum an chawm a, an hawp bawk laiin, mipui thleng phak sum lengvak a tlem tih a sawi.
Sum lengvak a tlem avang hian rukruk, tualthah, in rawk, ruang chhar, ruihhlo tawlh a ti hluar a. Mahni taksa ngei social media-ah langsar taka zawrh nasa takin a ti hluar mek tih sawiin, “Heng hi mipui hnen thleng phak lo sorkar kan hrawnin a rah chhuah a ni a. Tunlaia Mizoram chhunga thil thleng chu chanchinthar ngaihthlak leh chhiar peihawm loh khawpin a tha lo hle a ni,” a ti.
Tung ching hlawhtling Rualzakhuma hmalakna a tlawhnaah Lalnunmawia Chuaungo chuan, NLUP-in Mizoram chhungkaw tam tak dinhmun a khai chhuah nasatzia chu khawtinah zep theih loh khawpin a lang tih a sawi a. Rualzakhuma’n Tung Oil bakah a herna fe (cake) leh a hnah lei tha atana siama hralh chhuah tham an neih bakah, chhungkaw tam takin an zara eizawnna an neih bawk avangin NLUP hi Mizoram tan malsawmna a nih thu a sawiin, “Pathian leh mipuite zara Congress party a sorkar leh hunah, mihniam leh harsa zawkte thleng phak NLUP changtlung zawk kan kalpui dawn a ni,” a ti bawk.