Aizawl: Serchhip District Agriculture Marketing Committtee (DAMC) chuan phai lamah sawhthing rate a tlakhniam tak viau avangin an huam chhunga Secondary Collection Centre (SCC) atanga hralh chhuah a harsat thu an sawi.
Nimin khan Serchhip DAMC chu an chairman Paul L Khuma hovin Serchhip DC Meeting Hall-ah an thukhawm a. Serchhip district chhunga SCC tin atangin Supervisor leh Co-ordinator ten sawhthing lei zat, stock neih mek, hralh chhuah tawh leh PCC atanga lut leh tura an beisei zat te report an pe a. Sawhthing rate hi phai lamah a tlakhniam tak viau avangin SCC atanga hralhchhuah a harsat thu leh PCC atanga phur luh tur eng emaw zat la awm nia a lan avanga ngaihtuahna sen thar a tul thute sawi a ni a. Furpui lo thleng mekah loneituten a phurh kawngah harsatna an tawh thu te, sawhthing a chawr leh tan tawh avanga hmanhmawh a ngaih thu an thlen.
Thutkhawmah hian heng harsatna hrang hrang an tawh mek te an sawi ho a. Reserved price chungchang te, a hralhna rate siamrem chungchangte pawh sawilan a ni a. DAMC in SCC tin te tana inkaihhruaina a siam te sawi niin, loneitu te thatna tur leh rate tha zawka tihral theihna tur invenna hmanrua a nih avangin zawm ngei turin hriattir nawn leh an ni a. Supervisor te chu an bial theuha SCC te uluk taka vila, an hmalak dan te vila enzui pui tur leh, an harsatna te pawh tanpui a, a tul ang zela DAMC-a thlen thin ni se tiin an rel a ni.
He hunah hian Serchhip District chhunga SCC Supervisor, Co-ordinator, auction team leh DAMC member dangte an tel a ni.