Real Madrid forward Rodrygo chu Premier League club thenkhatin an ngaihven mek a, English club pangain Brazilian winger hi an ngaihven tawh niin an sawi.
Premier League club an sawi rik zingah hian Manchester City, Liverpool leh Manchester United te chu an langsar hle a. Nipui baza inhawn hunah Rodrygo hian Santiago Bernabeu a chhuahsan dawn tih thu a thang mek a, hei vang hian club hrang hrangte chuan lak luh dan kawng an dap hlawm a ni.
Kum 24 mi, Rodrygo hian kum 2019-ah khan Los Blancos hi a zawm a, Spain-ah a beisei angin mi ngaihven a hlawh tawk lo a, tunah phei chuan amah aiin Kylian Mbappe leh Jude Bellingham te chuan mi lawm an hlawh zawk a, hei vang hian a lawm vak lo niin an sawi.
Brazil manager atana Carlo Ancelotti ruat a nih hnuah Real Madrid chuan bung thar kai tumin ruahmanna an siam mek a, an manager kal chhuak ta hi Rodrygo pawhin zui chhuah ve a duh ta niin an sawi a ni.
Nikumah khan Rodrygo hian Manchester City zawm duh tawh lo mah se Pep Guardiola chu tuna amah ngaihventu langsar pawl a ni leh tho a. Real Madrid chuan £ maktaduai 84 (€ maktaduai 100) vela hralh an phal dawn a ni.
Arsenal pawh Rodrygo ngaihventu zinga sawi rik an ni a. Season hman mekah inhliam vangin player tangkai tur chhawr theih loh an nei hnem a, hei vang hian player thar chhawr tlak an melh nasa a. Tunah phei chuan striker chhawr theih an nei lo va, January atangin Gabriel Jesus pawh January inhliamin Kai Havertz pawh February atang khan chhawr theih loh a ni a. Hetiang a nih avang hian tlar hmaa chhawr theih turin lak luh hi an hreh lem lo a ni.
2023/24 season khan Rodrygo hian goal 18 a thun bakah mi goal thun tur vawi kua a siamsak a, Real Madrid chu nomawi pathum a lakpui a. Season kal mekah erawh beisei a pha lo hle a, goal ruk chauh a thun a, mi thun tur vawi ruk chauh a siamsak bawk.