Aizawl: Mizoram State Commissioner for Persons with Disabilities (PwD) Vanlaldiki Sailo nimin khan Hnahthial tlawhin, sorkar hmunhma leh damdawi in te chu rualbanlote tana awlsam zawka dawr theih an nih leh nih loh dante a enfiah.
Vanlaldiki Sailo hian ‘Accessibility India Campaign’ hnuaiah rualbanlote thlen theih lohna a awm em tih zirchiang tura Hnahthial tlawh a nih thu a sawi a. Sorkar hmun pawimawh Deputy Commissioner Office, District Hospital, Government Hnahthial College leh Govt Higher Secondary School-te chu tlawhin, a bikin inthiarna, grab bars leh ramp bakah signage tar a awm leh awm loh te a enfiah a. He hmalakna hi India ram pumah kalpui a nih angin state hrang hrangah hmalak mek a ni tiin, Mizoramah pawh chak taka hmalak a nih thu a sawi.
PwD Commissioner hian zirna In leh sorkar building zawng zawng chu rualbanlote tana thlen phak a ni tur tih sawiin, inthiarna leh bual inte pawh rualbanlote hman tur bik siam a tul tih a sawi a. Hei bakah sorkar hun pawimawh leh thiltih kalphung engkim an hriat ve theihna turin sorkar chuan an hriatthiam theih tura hrilhfiahtu, interpreter (Sign language thiamte) a hmang uar tawh hle tih a sawi bawk.