Aizawl: Home Minister K Sapdanga’n Kawnpui leh Sairang inkar national highway No 6 dinhmun enfiahin, kawng chhe zual lai chak zawka siam dan tur leh lirthei kal dan turte ruahmanna a siampui nghal.
Inrinni khan Home Minister K Sapdanga hian Sairang atangin kawngpui dinhmun enfiah tanin, Kawnpui an thlen hnuah Mualvum-a 1st IR Battalion hmunah kawng an enfiah atanga hmalak zel dan turte an sawi ho a. He hunah hian tun dinhmuna kawng chhe nasa zual lai bik, Sairang leh Buichali inkar chu ruah sur loh hun nghak kher lo va a rang lama siam turin NHIDCL a chah a. Chawlhkar khat hnuah an hnathawh dante a hmuna enfiah a tum thu Home Minister hian a hrilh bawk.
Chief Minister charge la mektu Home Minister K Sapdanga chuan Mizoram PWD enkawlna hnuaia la awm Kawnpui leh Khamrang inkar chu state sorkar sum a awm ang ang pawt khawmin, a chhe nasa zual lai thawm that hna thawh a nih tur thu a sawi.
UD&PA minister ni bawk, K Sapdanga chuan, hnathawh tibuai lo tura kawng dan a ngaih thin dawn avangin helai kawng siam hna hi NHIDCL leh PWD te bakah Police ten an vilpui dawn a, Khamrang leh a chhehvela YMA branch-te pawh tlawmngai tura phungbawma sawm an nih tur thu sawiin, NHIDCL ten ni tina an hmalakna chin chu Kolasib DC hnenah an report thin ang a, PWD pawhin nitin enfiah turin anmahni mi leh sa an tirh tur thu a sawi bawk.
Minister K Sapdanga’n kawngpui a enfiahnaah hian Deputy Speaker leh Kolasib bialtu MLA ni bawk Lalfamkima, Tuirial bialtu MLA K Laldawngliana, PWD Commissioner & Secretary K Lalthawmmawia, Kolasib Bawrhsap Robert C Lalhmangaiha leh Kolasib SP David H Lalthangliana, PWD Engineer in chief H Zoramliana, Addl Director FCS&CA, Central YMA President Lalhmachhuana leh MZP President H Lalthianghlima leh NHIDLC hotuten an tawiawm a ni.