- Dr. C. Lalrampana
A KAMKÊUNA
Kristian Missionary Mizoram tlawh hmasa bertu chu Rev. William Williams a ni a, Welsh Presbyterian missionary niin kum 1891 khan a lo thleng a, Khasi Hills-ah a thawk a, Mizote chanchin a zir hnuah Kristian ni ve turin a duhsakin a fuih nasa hle a. A hnuah Arthington Aborigines missionary pahnih Rev. J.H. Lorrain leh Rev. F.W. Savidge-te kum 1894 khan an lo thleng leh a, Mizoramah missionary hna an thawk zui ta a ni. Missionary lo chhuah achin kum 131 a liam ta. Thingbul lungbul biakna atangin Kristianah kan lut a, a van lawmawm tehlul êm! Tunah phei chuan kristian 87.16% kan tling ta hial. Kristian nung (active) ber pawl kan ni tih kan chetzia tinreng atangin a lang thei a, a lawmawm hle.
A LANGA THATNA CHU?
Kan zâmngul sawh phuntu sap missionary-te kha an entawn tlak tehlul nen, vawiina kan Zoram Kristian nundan leh khawsak mek dan nena khaikhin erawh hi chuan a va han inpersan tawh tehlul êm! A langah Kristian tha tak niin lang mah ila, a taka kan chetzia nen a inmil thei thlawt si lo. Kan thianpa Hindu kulmuk tak pakhat chu Kristian ni ve turin kan sawm a. Ani chuan-”A hranpaa Kristian nih kher a ngai hlei nêm, Kristian ang thovin alawm ka awm, Kristian pawh a taka belh chian dawl lo deuh vek in niin ka hria” a ti hmiah mai. Zahthlak duh rem rem tak a ni. A nihna takah chuan hmanlai sadukai leh pharisai nun, a langa mawi, takna awm si lo, Pathian rawngbawl aia kohhran rawngbawl nuam ti zawk, mi fak leh chawimawi beisei vanga kohhran hnathawh leh mawhphurhna hrang hrang chelh dem dum thin; mahni aia midang tha zawka ngai thei miah lo, thil hre ber leh thiam bera inngai, midang tumah ngaihsanna nei lem lo; fing kherek thiam; phakar thiam; midang chan tur awm lo leka engkim chuh zo duak duak duh; midang ngai thei miah lo; inkhawm tam, zing tawngtai inkhawm thulh ngai lo, Sande sikul kai ngai pawimawh, fehchhuah ngai pawimawh, thawhlawm chihrang hrang thawh tha, inkhawmpui kal uar, kohhran Crusade, camping leh program hrang hrang ngai pawimawh êm êm thin, a taka Pathian Thu nunpui chuang si lo, mahni hmasialnaa khat deuh vek si, hlawkna tur a nih dawn phawt chuan dawt sawi hreh miah lo, MRP aia sanga bungraw hralh ngam, bukna dik hmang duh lo, englaipawha mahni tanghma hai thin Mizote kan ni ta em ni? Takna, dikna, taimakna, rinawmna leh tlawmngaihna dik tak nunpui tak tak ngam si lo hian a langa thatna ringawtah kan tal buai a, chu chuan kan ram leh hnam, thangthar thalaite a nghawng chhe mek a ni.
INKHÂWM DAN DANG:
Mizoramah Kristian pawl chihrang hrang kan awm. Aizawl bikah chuan mipui tam zawk (87%) chu Kristian kan ni a, a bik takin Wikipedia-in a tarlan dan chuan Presbyterian denomination an tam ber a ni. Mizoram Presbyterian Kohhran Synod hi a lian ber a nih laiin, Denomination dang, Baptist Church of Mizoram, UPC, SDA, IKK, ICI leh Catholic Church-te pawh an awm nual bawk. Tin, pawl tenau zawk Bnei Menashe (Judaic)-te leh kohhran tenau neuh neuh bakah deleted church thlengin an awm a ni awm e. Hengho hian an awmna kohhran theuhah inkhawm, zaikhawm, thalai, nuho, pavalai inkhawm leh inkhawm chihrang hrang an neihte an hlah hauh lova tel kim thlap an tum theuh thin ni berin a lang. Inkhawm an ngai pawimawh ém êm a, vanram kai ngei ngeina chahbiah an ngai ni hialin a lang. Hetiang lo deuha inkhawm dan dang a awmleh a, chu chu Excise force, Police leh YMA, NGO-tena ruihhlo ngawlvei rual an khawm thin hi a ni.
Dt 18/05/2025 khan Hunthar Branch YMA chuan Hunthar Veng thlanmual leh a chhehvela drugs addict awmte mi 40 chuang lai an khawm a, Synod rawngbawltu Pi Baby Lalramsiamite team in chaw te pein tawngtaina leh Pathian thu sawina hun an hmansak a, an fakawm hle. Excise force, Police leh NGO, YMA-te’n addict an khawm thin mi engemawzat chu TBCC-ah an dahkhawm thin a, tunhnaiah a puakdarh a, hei vang hian Aizawl veng fianrial leh thlanmual hrang hrangah addict inkhawmpui a awm mek niin a lang. Ruihhlo ngai mangang lo dawngsawngtu TBCC lah a chhe zawnga sawi leh faksel, fak ve hrim hrim mipui zingah an kat nuk mai bawk nen. Tunge dika tunge thiam tih pawh hriat theih lohvin intihhriat uchuakna nena a hman hmanin an auchhuahpui chuah chuah mai bawk nen. Sawrkar lahin YMA a hlauh vangin permit nei lova ruihhlo mgaite enkawlna hmun dintu leh kalpuitu chung chang pawh dan angin engmah hma la ngam ngai hek suh. Dan tha tak nei inti siin rule of law a hmang ngam bawk si lo. ZPM Ministry hi chu a ler lam changtu mai an ni. A bul tan hun laia ministry-te khan dan anga ro an rel ngam loh avangin a tawpah a puak keh ta mek zawk niin a lang. Veng pakhata ka lennaah lirtheia bungraw dah chungin ka kalsan a, ka lennate’n “awm rei suh thlanmual a ni si a, ruihhlo ngawl vei ruk tur zawng an tam lutuk fimkhur a ngai. Zantin he thlanmualah hian addict an thu thup reng thin a nia” an ti a. Minute 20 bak ka awm ngam lova a rang a rangin ka hawleh nghal. Kan zonun khawtlang sukthlek dan hi a van hahthlak tehlul êm!
A TLÄNGKAWMNA
TBCC, Sakawrtuichhuna awm tawhte chu intelkhawm mêkin, WhatsApp Group te an siam a, Pu Zohminga, TBCC founder khin an tum niin thuthangva a awm mek. Sebo hnua sekawng khar ang a ni. Tuna thil thleng hi a vawi khatna chauh a ni lo. A hun laiin Mizoram sawrkar dawizep lutuk YMA/ NGO/ Kohhran ngam lo leh hlau reng renga rorel thinte avangin tunah hian lohtheihlohvin TBCC hi amahin a puakkeh darh ta mek a nih ber hi! Mizoram sawrkar hi zaka kun tlawk tlawk tur a nih laiin YMA/NGO/Kohhrante pawh hian dan lova institution kalpuitu an thlawp tlat nia a lan avangin zaka kun tlawk tlawk tur an ni ve tho bawk niin a lang. Tumah inmawhpuh tur chuang an awm lovang. Rule of law pawisa lo theuh theuh, a tawpah a sawhkhawk tha lo (impact) kan tuar tlang ta a nih ber hi! Hetiang khawpa ruihlo ngai (addict) an tam tawh chung hian sawrkar leh kohhran erawhin Zu bak an la ruihpui lo fo niin a lang. An thinlungah zu (liquor) ringawt hian hmun a la chang tam zawk niin a lang. Kum 1984-2025 kum 41 ruihlo kan do tawh chungin ruihhlo ngaite enkawlna hmun mumal taka kalpui pawh pakhatmah kan la nei lova, tunah sawrkarin thar thawh a’n tumleh mek chauh chu a nia aw! Kum 82 chhung ruihhlo kan do hunah chuan ruihhlo ngaite enkawlna pangngai deuh kan la nei ve turah ngai ila a fuh ber mai awm e. Aw! kan Zoram hi chhanchhuah a va han hun tehlul êm!