Fur kan lut chho leh tan chu a ni ta der mai. Kan inkalpawhna kawngpui pawh a ziaawm viau hlawm tawh laiin kan chak lakna kawng erawh duhthu a la sam lo reng a, nitin mamawh phur thintute pawhin tlan loh mai an rel leh ta ut ut mai.
Kan ram hruaitute hian ngaihsakah an nei lo nge, office lama nitina thut hahdam diai diai reng mai hi nuam an ti ta viau zawk emaw ni dawn ni. Sairang lam kawng, lirthei liante tlan kawng ber chu ruahtui tam lai chuan tlan ngam loh khawpin a chhe leh tawh a, nitin kan mamawh phurtute kawng ber a nih bawk avangin ngaihsak hi chu a tul tak zet a ni.
Sorkar hian vil hneh se la, pawisa chu a tul chuan hman tur chu a awm mai tur a ni. Mipui sorkar a nih miau avangin mipuite au aw hi an ngai pawimawh hmasa ber tur pawh a ni dawn lo’m ni? Khulai kawng, phai lam atanga kan bungraw lakluhna kawng ber hi Mizoram chin tal hi chu ngaihpawimawhah neiin, kumtin hian endikin, enfiah se la, tha turin vil hneh mawlh teh se.
Kan ram hi tlangram a ni a, khuarel chhiatna thleng palh thei pawh a ni. Chutih rual erawh chuan chutiang pawh ni chuang lo, kan chak lakna kawngpui chhe kumtin mai hi chu a zia lo lam deuh a ni. Sorkar hian chet la rang se la, vawiin atang hian ngaihsak teh se. Tawngka a harsatna sawi fo maite hi mipui hian kan kham ta. Harsatna sutkian chu mihringten kan tih ve tur a ni si a.