Power & Electricity Minister F. Rodingliana chuan mipuiin kawlphetha an chhit man dik taka an chawi theih nan kawlphetha chhit man siamna software thar, Pro rata basis chu tun thla (May) atanga hman tan a nih thu a sawi.
Inrinni khan P&E Minister hian Dawrpuia a chenna inah thu thar thehdarhtute kawmin kawlphetha chhit man siam dan thar, Pro rata basis chungchang sawiin, Revamped Distribution Sector Scheme (RDSS) hnuaiah electric sem darhna kawnga hmasawnna hna hrang hrang thawh mekin a ken tel, electric bill siamna software thar, Pro rata basis chu Aizawl, Lunglei, Lawngtlai, Siaha, Serchhip, Champhai, Khawzawl, Saitual leh Kolasib-ah te May 2025 atanga hman tan a nih thu a sawi.
P&E Minister chuan tuna kalphungah chuan mipuiin thla khat danah kawlphetha chhit man chu chhut chhuakin bill siam thin a ni a. Pro rata basis-ah erawh chuan nitin hman zat atanga chhut a ni tawh dawn tih sawiin, “He ruahmanna hi mipuiin an hman man dik tak an pek theihna tur ruahman a ni a, nitina an hman man bak bill siam belh a theih tawh dawn lo a ni,” a ti.
F Rodingliana chuan Pro rata basis hian tariff slab sang zawkin bill a chhut (calculate) dawn lo a, reading lak hun dik taka lak a nih loh vanga tariff slab sang zawka chhut ngai thin ti pawh a bo tawh dawn tih a sawi. Mipuiin bill an pek that chuan an bill a tlem tawh dawn a, bill pe tha lo te erawh chu an bill a hniam phah dawn chuang lo tih a sawi.
Kawlphetha chhit man bill kaphung thar hman avangin mipuiin an hman zat dik tak an chawi tawh dawn tih sawiin F Rodingliana chuan, “Mi thenkhatin kawlphetha chhit man dik tak an lo pe lo a nih pawhin, tunah chuan an hman man dik tak an pek tawh dawn avangin bill sang deuh pawh a awm mai thei a. Hei hi sorkarin kawlphetha chhit man a tihsan vang lo vin, dik taka an hman zat bill a nih tawh dawn avangin lo hrethiam turin mipui kan chah a ni,” a ti.
Kawlphetha chhit man siamna thar Pro rata basis hman tan avang hian bill la hmulo awm theih tih sawiin P&E Minister chuan, bill la hmu lo te tan pawh computer atangin pedmconsumer.ugoerp.com-ah leh mobile application pedmconsumer tih chu download theih niin, hetah hian bill pawh a pek nghal theih bakah bill chipchiar zawkin pdf format a download theih a nih thu a sawi bawk.