Aizawl: Sports Minister Lalnghinglova’n Mizoramin sports leh entertainment huangah theihna sang tak a neih avangin ram chhunga sumdawng lian (investor) te chu Mizoram lam hawi turin a sawm.
Inrinnia Bharat Mandapam, New Delih-a ‘Rising Northeast Investors Summit, 2025’ ah Tourism Minister Lalnghinglova Hmar chuan chawhma session-ah ‘Northeast: The New Hub of Tourism and Hospitality’ thupui sawiin, hmarchhak a bikin Mizoramah tourism, sports leh entertainment huanga theihna sang tak a nei tih sawiin, investor te chu Mizorama zin tur leh sumdawnna kawng zawng turin a sawm.
Lalnghinglova Hmar chuan hmarchhak pumpui chu Odisha aia mihring tlem zawk, area-ah pawh UP tiat vel chauh ni mah se, khuarel mawinain a tuam vel, boruak thianghlim leh culture hausa, tourism-a theihna sang tak nei, ASEAN ramte nena inhnaih leh inkalpawh awlsam, Act East Policy hlawhtlinna atan pawh dinhmun pawimawh tak a luah tih a sawi.
Tourism Minister chuan Mizoramin a bikin adventure tourism-ah theihna sang tak a nei a, theihna a neih thu sawi ringawt an duhtawk tawh lo a, a taka chantir tumin theihtawpin hma an la mek tih a sawi a. Red Bull nen tangkawpin nikumah Asia rama Urban Downhill mountain bike racing hmasa ber chu Aizawlah an buatsaih a, kuminah pawh an buatsaih leh dawn tih a sawi a. Mizoram-a Christmas lawm dan, a bikin veng tin khaw tin a ruaitheh chu hmundanga awm ve lo, rampawn thlenga tihlar leh zawrh tlak a nih thu a sawi a. Hmarchhak hi hmun kilkhawr a ni tawh lo va, Mizoram pawh Delhi atangin darkar hnih leh a chanve ah a thlen theih a, Aizawl bul thleng rel a luh tawh dawn avangin investor te tan remchanna a inhawng dawn tih a sawi.
Mizorama Dampa Wildlife Sanctuary chu Asia rama clouded leopard concentration sanna ber a ni tih sawiin Lalnghinglova Hmar chuan, Aizawl chu India rama traffic dan zawm that berna khawpui a nih thu te, Mizoram chu state ralmuang, India rama ziak leh chhiar thiam zaa zaa puan hmasak ber a nih thute a sawi bawk.
Ministry of Development of North Eastern Region (DoNER) buatsaih ‘Rising Northeast Investors Summit 2025’ hi May 23, 2025 khan Prime Minister Narendra Modi-a’n a hawng a, a hawnna inkhawmah Chief Minister Lalduhoma pawh a tel a ni.