Aizawl: Union Minister of State for Minority Affairs and Fisheries, Animal Husbandry & Dairying George Kurian-a’n Inrinni khan Lengpuiah Fish Farmers’ Training Centre dinna tur hmun, Laldenga Fisheries Demonstration Farm tlawhin, hma lak tum dante a enpui.
Zan khat riaka Mizoram tlawha zin, Kurian hian Inrinni khan Lengpui Airport thlengin Fisheries Minister Lalthansanga leh Fisheries department hotuten an dawngsawng a. Lengpui a thlen hian Lengpuia mi mal sangha dil siamte bakah North Eastern Council (NEC) hnuaia Fish Farmers’ Training Centre dinna tur hmun, Laldenga Fisheries Demonstration Farm a tlawh.
Union minister hnenah fisheries minister leh department hotuten sangha khawitute harsatna an thlen a, hmasawnna tura sorkar laipuia state sorkarin project a thehluh tawhte, Zawlnuam-a Integrated Aqua Park tur telin, lo pawmsak thuai a nih theih nan an ngen.
Union minister chuan sangha khawitute suma an harsatna sutkianna atan Fish Farmers Producer Organisation (FFPO) hnuaia Equity Grant a a awm tih kawhhmuhin sangha chaw laknaa an harsatna chu tual chhunga sangha chaw siamchhuah dan ngaihtuah tur leh startup ang zawng pawha an kalpui theih thu a sawi.