Aizawl: BJP Mizoram President Vanlalhmuaka’n Mizorama sorkar tawhten belhchian an dawl lo zel mai chu pawi a tih thu a sawi.
Thawhtannia BJP Mizoramin an pisa-ah chhung inkhawm an hmanah thu sawiin Vanlalhmuaka chuan Pro Volleyball League final hmang tura Union MoS George Kurian lo kal thei leh Mizoram Volleyball Association (MVA) hruaituten tha taka an lo dawngsawng chu lawmawm a tih thu a sawi a. Union minister nen an inkawmnaah Mizoramin sport infrastructure duhthusama tha a neih loh avangin hemi kawnga hma lakpui a tum thu leh infiammite tana theihtawp chhuaha hmalak a tum thute a sawi chu Mizoram thalaite tan thu lawmawm tak a nih thu a sawi.
Mizorama sorkar tawhte hian kawng tinrengah belhchian an dawl lo zel mai chu pawi a tih thu sawiin, “Political party tinte hian kan ram hi min sawp chhe vek ta mai niin a hriat a, thalai hnathawh tur mumal nei lo beidawngte, kuthnathawktuten an thar hralhna tur nei loa mangang au aw hriatte hian rilru a rum thin,” tiin, BJP-in Mizoram hi kum 10 tal hruai ngat se awlsam zawkin ramin intodelhna kawng a zawh ngei tur thu a sawi.
Vanlalhmuaka chuan, “BJP thil tum leh Mizoram mipuite beisei hmasawnna chu mipuiah a thleng tha lo va, politics kan khelh chhan bulpui ber hi hmasawnna a nih a pawimawh a. Chuvangin, mipui mamawh pe thei tur tak tak chu BJP chauh hi a nihzia tunah chuan mipuiin an hre chho ta a ni,” a ti bawk.