Aizawl: Excise & Narcotics Department leh Central YMA hnuaia ruihhlo dotu – Central Anti-Drugs Squad (CADS) chuan Pathian zan khan Joint Operation neiin, Phunchawngah heroin gram 549 (Hawng 50) leh a neitu nia puh mi pahnih – C. Lalramnunmawii (37), Chanmari West, Aizawl leh Lalnunmawia (35), Tuikual North, D Mual, Aizawl-a khawsa nia inchhalte an man.
He thubuai chhuina kal zelah Thawhtanni zing dar 1-ah Luangmual Industrial Complex-ah heroin kg 1 leh gram 549 (Hawng 140), Methamphetamine kg 9 leh gram 817 an man leh a. Heng bakah hian ruihhlo phurhna atana an hman lirthei, TATA Yodha (MZ01 AB-4110) leh ruihhlo thila indawrna atana an hman mobile phone pahnih an man sak bawk.
Ruihhlo man zawng zawng hi heroin Kg 2 & Gram 98 leh Methamphetamine Kg 9 & Gram 817 an ni a. Heng ruihhlo an mante hi hnam dang hnena pek tur niin an sawi.
Ruihhlo vanga mante hi dan tlawhchhanin thubuai siamsak an ni a, May 26, 2025 khan Special Court (NDPS Act), Aizawl District-ah hruai nghal an ni.