Sairang leh Buichali inkar kawng chhia kan sawi fo a, kumtin a chhiat dan pawh hre fotu kan ni. Tin, siam ngai fo a nih thu kan hre bawk. Lirthei lianin a zawh kawng, kan nitin mamawh lakluhna kawng a nih miau avangin enkawl leh duat a ngai a, ngaihven leh ngaihsak pawh a tul hle reng a ni.
Sorkar liamta hrang hrangah PWD lam hi chief minister in an chang tlangpui a, tun term kan hman mekah erawh chuan chief minister in chang lovin minister in an chang ve ta a, department lam nge, hnathawktu company lam hian an hlau lo zawk ni dawn ni, chet lak a muang ruih mai ni hian a hriat a, rorelna fawng chelhtute pawhin an ngaihven deuh chu a tul khawp mai.
Inrinni khan home minister chuan he lai kawng chhia hi a hmuna kalchilhin, hnathawktute chu hna tha taka thawk tura chahin, kar khat hnua a enfiah leh tur thu a sawi a, zawm hlawh tak maw? Hetih lai hian a changtu PWD minister erawh chuan vawiin thlengin thawm a la nei lo a, mak zawk tak a ni.
Chief minister enkawl thin, sum nise finance changtu ni nghal bawkin a enkawl thin a nih miau avangin hun hmasa lamah chuan PWD lam hi an chak deuh pawh a ni thei. Tun kan sorkar hrawn mekah erawh sum tamna ni thina kan hriat kha an hnathawh a muangin, an langsar ta lo hle mai a, kalkawng hi kan ngaihsak thar leh deuh chu a tul ta hle mai.