Aizawl: MPCC Spokesperson Lalremruata Renthlei chuan ZPM kaihhruai kalphung thar sorkar hian mi tlem te hlawkna, mi tam tak tan beidawnna kawng a zawh mek tih a sawi a; ZPM chu kalphung thar, mipui sorkar siamin mipui bumah a puh.
MPCC-in nimina Congress Bhavan-a Political Training hun an hmanah thusawiin Lalremruata Renthlei chuan, ZPM party chu engtikawng pawha sorkarna siam a, thuneihna chan an tumna lamah ram tan pawi an khawih zel tih a sawiin, “Kalphung thar, mipui sorkar siamin mipui an bum a. An huat em em, hun rei lo te chhunga hlawkna, hun rei tak chhunga hlohna kalphung chu an kalpui mek thung,” a ti.
ZPM sorkarin kut hnathawktute chaw chahin sawhthing kg-ah Rs 50-a lei zawhsak vek an tiam chu lei zawh chu sawi loh, kuthnathawktute mangangin Rs 16/17/18 velin kg-ah an tiral mek tih a sawi a. Kut hnathawktuten tiam an nih ang ngeia an phut chu kg-ah Rs 50-a leisak bak a awm lo tih a sawi.
Lalremruata Renthlei chuan Mizoramah kut hnathawka eizawng hi mihring za zelah 70 ang vela ngaih ni mah se, ZPM sorkar chuan Mizoram budget thar berah agriculture leh horticulture-ah sorkar kum liamta aiin sum ruahman a tlem tih sawiin, “Nikum aiin kumin budget tharah agriculture leh horticulture-ah sum dah a tlem zawk a. Agriculture-ah phei chuan nikuma sum hman zahve vel zet chauh budget-ah dah a ni a. Budget en chuan horticulture-ah hmasawn tumna a awm lo tih lang,” tiin, kalphung thar sorkar hian mitlemte hlawkna, mi tam tak tana beidawnna kawng a zawh mek a. Sawi mam lo va, an ti ang an tih, an tiam tihlawhtling tura an phut thu leh chu chu mipui laka an bat a nih thu a sawi.