Aizawl: Mizoram sorkarin mipui tan a thlawna inenkawl theihna tur a duan, Mizoram Universal Health Care Scheme (MUHCS) chu mi tinin chhawr tangkai se a duh thu sawiin, MUHCS-a la inziak lut lote chu inziak lut vek turin Health Minister Lalrinpuii’n a sawm.
Nimina Civil Hospital, Aizawl-in MJA General Headquarters member-te tan a thlawna inentirna, Free Health Check-up a buatsaih sak chu nimin khan Health Minister Lalrinpuii’n Civil Hospital, Aizawl Doctors’s Seminar Room-ah a hawng a. Hawnna inkhawmah MUHCS hnuaiah hian damlo mamawhtuten awlsam zawka phai lam an pan theih nan Simplifying Referral System an duan hmangin sorkar hnathawk 260 vel state pawna refer an ni tawh a, hei bakah hian mipui nawlpui leh pensioner pawh thahnem tak refer an ni tawh tih a sawi.
Health minister chuan mipuiin inenkawlna changtlung zawk an dawn theih nan sorkar enkawl damdawi inte thuam that mek a nih thu sawiin Health Minister chuan, tunah hian Civil Hospital, Aizawl-ah Cardiology Operation Theatre sak mek a ni a, peih a nih hunah tunhmaa an tih theih loh thil tam tak an ti thei dawn a, kal thlak (kidney transplant) pawh an ti thei tep a. Lung zai theihna tur pawh ZMC&H-ah buatsaih mek niin, hei hi peihfel a nih chuan Private Hospital-a Rs nuai 8 chuang sen ngai thin chu Rs nuai 1.5 vel lekin a zai theih dawn a, MUHCS-a inziak lutte tan chuan a thlawn veka tihtheih a ni dawn a, hei bakah hian thluak zaina thlenga buatsaih tum a nih thu a sawi.
Lalrinpuii chuan ram dang nen khaikhinin Mizote an dam rei tawk lo nia a lang chu a vei thu a sawi a. Natna inkaichhawn theih loh chi, Non-communicable diseases an tih zunthlum, thisensang, cancer leh natna dang dang chu Mizote suat nasatu anih avangin hetiang natna laka fihlim turin taksa enkawl that a, insawizawi tam a tul a. A khat tawka mahni hriselna dinhmun endiktir a tul thu a sawi.
Free Health Check-up hawnna inkhawm hi Civil Hospital, Aizawl Sr. Medical Superintendent Dr. Lalchhuankimi’n a kaihruai a, MJA President C. Lalrambuatsaiha pawhin thu a sawi.