National Food Security Act (NFSA) hnuaia hamthatna dawngtu tihpunsak turin Chief Minister Lalduhoma’n Union Minister for Consumer Affairs, Food & Public Distribution Pralhad Joshi a ngen.
New Delhi-a cham mek, Chief Minister Lalduhoma’n nimin khan Union Minister Joshi chu a chenna inah a kawmin, Mizorama ration card nei mek zaa 60.26 chauh NFSA hnuaiah an awm avangin NFSA hnuaia hamthatna dawngtu zat hi mi nuai 1.7 a tihpunsak turin a ngen a. Chief minister ngenna hi union minister hian theihtawp an lo chhuah tur thu a hrilh a ni.
Pathianni khan chief minister hian Union Minister, DoNER Jyotiraditya Scindia chu Delhi-a a chenna inah a kawm a. Thenzawl khua chu DoNER hnuaia Global Model Site atana thlan a nih avangin lawmthu a hrilh a. Thenzawl Golf Course thuam thaa international standard-a siamna tur proposal kal mek chu tihhlawhtlinsak turin a ngen.
DONER minister hian Mizoram thlai tharchhuah, a bikin sawhthing leh Mizo hmarchate hralhna bakah, sports sector tihhmasawn kawngah Mizoram chu theihtawp a lo chhuahpui tur thu chief minister a hrilh a. DoNER hnuaia Mizoram hmachhawp hrang hrangte pawh an thlir ho bawk.
Pathianni vek khan Chief Minister Lalduhoma chuan Union Minister for Minority Affairs Kiren Rijiju pawh a chenna inah a kawm a, Mizorama PMJVK hnuaia project pawimawh zualte en dunin hmalak zel dan turte an sawi dun.
Inrinni tlai khan Chief Minister Lalduhoma’n Union Minister for Tribal Affairs Jual Oram pawh chu a pisaah a kawm bawk.