Russia leh Ukraine chu kum thum chuang an indo tawhah inkahhai puang turin inrem thei lo mah se a vawi thum nan leh a tawp ber nan Pathianni khan mi tang za rual an inthleng leh.
Mi tang inthleng hma lawk hian Ukrainian khawpui, Kyiv leh region dang eng emaw zat chu Russian drone leh missile hmanga beih leh niin mi 12 vel thi an awm.
Ukrainian thuneitute chuan Inrinni zan leh Pathianni tuka beihna hi February, 2022-a thahpuia Russia-in a rûn hnua zan khat thila a beih nasat ber tum niin an sawi.
Russia-a defense ministry chuan lehlam lehlam hian an sipai 303 ve ve an inthleng tih a puang a. Inrinni khan sipai leh civil mi 307 leh Zirtawpni khan 390 an lo inthleng tawh a, hei hi mi tang an inthleng tam ber a ni.
Ukrainian President Volodymyr Zelenskyy pawhin mi tang an inthleng thu hi Pathianni khan X-ah a tar lang a, “Ukrainian venhimtu 303 hruai haw an ni,” a ti.
Ukraine-a hruai hawte chu ‘Armed Force, National Guard, State Border Guard Service leh State Special Transport Service’ an ni tih a tar lang bawk.
Tun thla tira Istanbul, Turkey-a a vawi khat nana remna a awm theih nana ram pahnih indawrna hmasa berah Kyiv leh Moscow hian indonaa an inmansak sipai leh civil mi 1,000 inthleng an remti dun a ni.
Tun tum hi mi tang inthlenga a Ukrainian civil mi an tel tam ber tum a ni.
Mi tang inthleng mah se indona erawh a la kal reng a, ramri hrul km 1,000 vel zetah an la inep a, sipai sang tel thah ni tawhin nasa takin an la inkap reng tho.
Russian defense ministry chuan Inrinnia Russian President Vladimir Putin-a’n a sipaite a tlawh hnuah Pathianni khan hmar lamah Ukrainian sipaite chu Kursk region-a ramriah an nawr kir nasa niin a puang.
“Ni tin sipaite hian hma an sawn zel a ni,” tiin defence ministry thupuangtu, Yaroslav Yakimkin-a chuan a sawi a, Russian sipaite hian hmarchhaka Sumy region, Kursk nena an inrinaah kar kal ta khan Marine leh Loknya an la niin a sawi a. Kharkiv region-ah pawh hma lam pan zelin Vovchansk khua an tichhia niin a sawi bawk.