Aizawl: Mizoramin sports leh skill development kaihkawp a tum chungchang leh football infrastructure tihhmasawn dan tur chungchangte sawipuiin, nimin khan Sports Minister Lalnghinglova Hmar-in Union Minister for Youth Affairs & Sports Dr. Mansukh Mandaviya chu Tughlaq Road, New Delhi-a a chenna inah a kawm.
Sports minister chuan sports coaching leh training chu skill inzirtirna pawimawh tak a nih angin, Mizoramin skill development leh sports kaihkawp turin hma a la mek tih a hrilh a. Hemi atan hian Ministry of Skill Development & Entrepreneurship hnuaia Sports, Physical Education, Fitness and Leisure Skills Council (SPEFL-SC) kaltlangin project thehluh tawh a nih thu leh, MSDE Minister leh Secretary bakah SPEFL-SC CEO te nen pawh an thlirho tawh thu union sports minister hi a hrilh.
Union minister leh Mizoram minister-te hian project proposal pawh an thlirdun nghal a. Union sports minister chuan pilot project anga kalpui thuai theih nise a duh thu sawiin, MSDE Minister Jayant Chaudhary pawh a lo sawipui tur thu Lalnghinglova Hmar hi a lo hrilh a ni.
Sports leh skill kaihkawp hi Mizoram sorkarin Olympic 2036 vision a neih denchhena kalpui tum a ni a. Coach-te tan ‘Training of Trainers buatsaih’ te, sorkar school-a Physical Education zirtirtute training pek a physical education mumal tak kalpui te, state pum huapa naupang zawk te tan sports coaching leh talent zawnchhuah kalpui te a tel a ni.
LESDE minister ni bawk, Lalnghinglova Hmar chuan sorkar laipuia MSDE Secretary Atul Kumar Tiwari pawh a pisa-ah kawmin, sports leh skill development kaihkawpna tur project proposal-a belh leh siam that ngai lai te an sawi dun a ni.