Aizawl: Adviser to chief minister (hand holding) Dr KC Lalmalsawmzauva chuan thlai thar lei chungchangah sorkarin full mark hmu lo mah se, pass mark tha tak an hmuh thu a sawi.
Nimina ZPM-in an party pisaa chhung inkhawm an hmang a, he huna thusawitu Dr KC Lalmalsawmzauva chuan, chief minister Lalduhoma kaihhruai kalphung thar, mipui sorkar chu mipui tana ding a nih angin, thlai thar lei chungchangah pawh party mi leh sa bik sawi lo vin, kuthnathawktute thlai thar lei a kalpui mek tih a sawiin, “Harsatna hrang hrang avangin ruahman ang leh beisei ang diak diakin hlawhtlinna famkim chang rih lo mah ila, kan thutiamah erawh nghet takin kan ding a. Kan state-a sorkar ding tawhah kan la ti tha fal hle,” a ti.
Dr KC Lalmalsawmzuava chuan thlai thar leina atan District Agriculture Marketing Committee (DAMC)-a pawisa pek chhuah tawh zat chu Rs vbc 58.08 a ni a, sawhthing bikah quintal 1,23,915.23 lei tawhin, heta tang hian sorkarin Rs vbc 7.5 a hmu let tawh tih sawiin, “Thlai thar lei chungchangah hian full mark kan hmu lo na a, pass mark tha tak kan hmu niin kan hria a. Kan pass-na division erawh chu mipuite min pek turah kan dah a ni,” a ti.
Kumin hian India ram hmun dangah sawhthing thar an tam avangin a man nasa takin a tla hniam tih sawiin Adviser to chief minister chuan, “Bangladesh ram buaiin hralh chhuah kawngah harsatna min siam a, Mizoram atanga phai lama phur chhuak tur lirthei kan duh anga kan hmu theih loh bakah sawhthing processing lamah kan inpeih hman lo a, hengte hi kan harsatna tawh zualpuite a ni,” tiin, mipuiin an hriatthiampui hle nia a hriat thu a sawi.
Adviser to chief minister chuan Mizoram chu UT a nih atanga kum 53-naah pawh hming chherna tham thlai thar chhuah an la nei lo hi a zahthlak avangin, sawhthing hi state hmingchher nan hman an tum tih sawiin, “Kumin hi market system siam fel kumah kan ngai a, Mizoram sawhthingin Cachar leh Siliguri kal pela Visakapatnam leh Delhi Mandi te direct-a a thleng ve ta hi thil chhinchhiah tlak tak a ni,” tia sawiin, tunah hian Singapore-ah thawn tura buaipui mek niin, rei lote hnuah thawn chhuah theih an inbeisei thu a sawi bawk.