Aizawl: Mizoram mamawh buaipuia Delhi-a cham mek Chief Minister Lalduhoma’n nimin khan Union Health Minister JP Nadda chu a pisaah kawmin, Zoram Medical College & Hospital (ZMC&H) tihhmasawnna tur chungchang a sawipui.
Chief minister chuan PM-ABHIM hnuaia sak mek, ZMC&H-a Critical Care Block chu zawh fel tep a nih thu union health minister a hrilh a. Critical Care Block hi a nihna tur ang taka hman a nih theih nan hnathawktu tur doctor, nurse leh a dangte lakna tur sum Rs vbc 21.63 chu pe chhuak turin a ngen.
Union health minister chuan cabinet memorundum siam a, cabinet meeting-in a ngaihtuah tura a lo chhawpchhuah thuai tur thu chief minister hi a hrilh a ni.
Nimin vek khan Chief Minister Lalduhoma’n 16th Finance Commission Chairman Arvind Panagariya chu a pisaah kawmin kum lo kal leh tur atana Mizoramin 16th Finance Commission hnena Mizoram mamawh a thlen hrang hrangte a sawipui.
Chief minister hian Mizoram mamawh a thlen zingah Thenzawl-a Peace City Project te, Bana Kaih (Handholding) Scheme bakah village council-ten fund tha zawk an hmuh theihna tura rawtnate chu ngaih pawimawhsak turin a ngen.