Aizawl: St Paul’s Higher Secondary School-in HSLC leh HSSLC zirlai tithate chawimawina hun, Paulians’ Proficiency Award 2025 an hman chu School Education Minister Dr Vanlalthlana’n a hmanpui.
Nimina St Pauls School Auditorium-a hun hmanah Dr Vanlalthlana chuan, zirlai hlawhtlingte chu an school hlawhtlinna leh hmingthat tawhna vawngtu leh chawinungtu nih tum zel turin a chah a; hlawhtlinna tluantling chang tur chuan mahni inthununtheihna, rinawmna leh taimaknate nunpui tlat a pawimawh thu a sawi.
Minister chuan zirlai nih chhung chuan thiamna rintlak leh tangkai, ram leh hnam tana chhenfakawm thiamna neih tuma bei tur leh, sikul hung chhung an pelh huna harsatna leh buaina hmachhawn thiam turin leh inelna sang zawk an hmachhawn hunah pawh hlawhtlinna an chan theihna tura inbuatsaih chhunzawm zel turin a chah.
Dr. Vanlalthlana chuan zirlaibu pawn lama thiam thil zir tel thin a pawimawh tih sawiin, mi zinga khawsak thiamte, harsatna kara ruahmanna siam thiamte leh a hun leh hmun azira inherrem thiamte a pawimawh thu a sawi a. Tunlai mila thiamna hrang hrang chhuakte pawh belchiang a, hmang tangkai hmasatu nih tum zel turin a chah bawk.
He hunah hian St. Paul’s HSS Principal Bro. Kuriyan M.S. in inlawmna thu a sawi a. Paulians’ Alumni Association (PAA) aiawhin President, Dr. Franklin Lalrinngheta’n thu a sawi a. Zirlai hlawhtlingte aiawhin Cynthia Lalhlupuii Shangpliang ten thu an sawi.