ZPM Spokesperson K Laltluangkima chuan ZPM sorkar kalphung tharah kawngpui an siam tawhte a dum zuar satliah lo va, a mam tha a, motor-a tlan a nuam em em bik a, a tlo dawn bawk tih a sawi.
Nimina Aizawl Press Club-a thu thar thehdarhtute a kawmnaah K Laltluangliana chuan Chief Minister Lalduhoma leh PWD Minister Vanlalhlana te thawhrimna zarah kawngpui tha an nei teuh tih sawiin, “‘ZPM kawngpui chu a tha bik tur a ni,’ kan ti a, a tha bik reng a ni,” a ti.
ZPM thupuangtu chuan mi tam takin khawpui kawngte a dum zuar a, a sawh boh boh an ti thin chu kalphung hlui kawng siam a ni tih a sawi a. “Aizawl khawpui chhungah ngei pawh kawng biboh a la tam. ZPM kutthlakna chin chu a mam nuam khawp mai a, kar lovah mipui hian ZPM mizia leh an hna a that bikzia chu an hre dawn, an hre telh telh dawn,” a ti.
ZPM sorkarin kawng mam tha an siam thei chu tuten emaw chuan na an lo ti a ni mai thei a, Zuangtuia Hot mix plant chu hnawk an ti tlat a, tute emaw infuihpawrhin an hal ta tih a sawiin K Laltluangkima chuan, “Khawlpui hal chhiat a nih tak avangin hmasawnna than a thu dawn a, mipui pawh kan dawhtheih hret a ngai ang a, harsatna tam tak tawk mah ila, ZPM chuan kawngpui tha a buatsaih zel dawn tho tho,” a ti bawk.
K Laltluangkima chuan MNF chu an sorkar ngai tawh dawn lo tih sawiin, tuna MNF ho an inawihnunna ber chu ‘vangvat kai’ tih niin, tun atanga kum ngaah chuan vangvat kai nih hian awmzia a nei tawh dawn lovin, vangvat kai ho hi politics atangin mual an liam zo tawh dawn tih a sawi.
MNF President Zoramthanga’n central sorkarin Lalduhoma sorkar chu engahmah a ngai lo anga a sawi chu dawt chiang bang a nih thu sawiin ZPM thupuangtu chuan, “Central hruaitute hi MNF hruaitute ang an ni ve lo va, anmahni party-pui ang ni lo mah se, ram hruaitu an nih miau avangin zahawm tak leh ring ngam takin ZPM ministry hi an dawr a, an ring ngam a, ram rawng an bawlho thin,” tiin, eng kawngah mah central BJP-in ZPM an thlei bik loh a tih theih thu leh, central sorkarin a bikin Lalduhoma an ngaihsanzia kawng hrang hrangin an lantir fo tih a sawi bawk.
Congress chungchang pawh sawiin, MPCC President Lal Thanzara’n hman atanga tun hnai thlengin ZPM leh BJP hi thawk ho angin a puh ngar ngar a, inthlan hnuhnung berah pawh pawisa tam tak pek thu thlengin sawi thei mah se, finfiahna phawrh tur erawh a nei lem lo tih a sawi.