Cristiano Ronaldo chuan kum 40 ni tawh mah se kum 29 ang vel chauh a la nih thu a sawi.
Tun hnaiah khan mihring hriselna leh an fit dan zir thin, tech company Whoop chuan Ronaldo hi test hrang hrang an neihpui a, hetah hian an company ambassador ni mek result hi a tha hle.
Kum 40 mi chuan, “Khatiang taka result tha kha ka neih ka ring pha lo a, khati a nih chuan ka kum hi 29 vel chauh a la ni a. Chuti a nih si chuan kum 10 vel chu football ka la khel thei dawn a ni mai,” a ti.
Portuguese star hi a invawng uluk em em a, a insawizawi nasa bawk a, nitin hian pen 17,000 vel a kal ziah a, “Hetiang hi ka nunphung nghet a ni a. Ka awm mai mai mang lo a, ka che reng thin a, football ka khelh loh leh naupang nen kan infiam thin a. Chuvangin, hetiang taka result tha ka nei thei hi mak ka ti vak lem lo,” a ti a ni.
Ronaldo hi a mu hnem a, zan tin darkar sarih vel a mu ziah a. “Mut hnem hi ka hmanraw tangkai berte zinga mi a ni a. Thin thi dapa mut hi kan hlawkpui em em a, engkim mai chin fel theihna a nih bakah zana tha taka muthilh hian nun a pawt sei hle,” a ti.
“Tlema la naupan deuh laiin kan taksa hi chhe thei lo emaw kan ti thin a, kan upa tial tial a, kan taksa theih tawk a tlem telh telh thin a, kan insiam rem thiam a pawimawh hle a. Hun kal zelah kan inthlak danglam thiam a ngai thin,” a ti bawk.
June 30-ah hian Ronaldo chuan Al Nassr-ah a contract a hmang zo tawh dawn a ni.