Aizawl: Kum upate leh ruihhlo ngaite tana a thlawna inentirna ‘Mental Health Clinic & Camp’ chu nimin khan Social Welfare Minister Lalrinpuii’n a hawng.
Dawrpui Multipurpose Centre-a hawnna inkhawmah Social Welfare Minister chuan a department chan pahnih Social welfare leh Health (Directorate of AYUSH) thawhhonaa buatsaih a ni chu lawmawm a tih thu a sawi a. Sorkar chu India danpuiin Directive Principles of State Policy hnuaia a phut angin mipui tana ding tur a nih thu a sawi a, hemi kawng a mawhphurhna hrang hrang tihlawhtling tur hian theihtawp a chhuah zel tur thu a sawi.
Lalrinpuii chuan Mizoram sorkar hnuaia kum upate hamthatna tihpun kawngahte, ruang phurhna kawnga ruahmanna an siam kaltlanga ruang 666 phurhsak a nih tawh thu te, mipui tan pawisa sen ngai lova inenkawlna tur – Mizoram Universal Health Care Scheme hman a nih mek thu te leh ruihhlo do nan ‘Demand Reduction’ lamah hma lak mek a nih thu a sawi bawk.
Ruihhlo avanga harsatna tawkte chu ram hmelma an nih loh thu sawiin minister chuan, heng ruihhlo avanga harsatna tawk mekte chhanchhuak tur hian sorkar, kohhran, tlawmngai pawl leh home dintute tangruala tul thu a sawi a. Ruihhloin a tihbuai chhungte pawh beidawng mai lo va, sorkarin ruahmanna a siamte sawt zawka kalpui a nih theih nan sorkar tha tichaktu nih tum zawk tura chahin, Mizoram chhunga Centre tihchangtlun leh ‘Detoxification leh Day Care Facility’ lamah tan la turin ruahmanna kalpui mek thu a sawi.
Social Welfare Department leh National AYUSH Mission tangkawp buatsaih ‘Mental Health Camp’ hi vawiin hian neih chhunzawm a ni dawn a. AYUSH doctor-te an duty a. Dam lote tan a thlawna inentir a theih bakah damdawi pawh a thlawna sem a ni.