Aizawl: Welfare Institutions & Hostel Scheme (WI&HS) kaltlanga man tlawma buhfai pek thin chungchangah social welfare leh supply department-in thawhhona thuthlung, ‘Convergence Agreement’ an ziak.
Nimin khan Royale Lalawi Hotel, Khatlaah Social Welfare Minister Lalrinpuii leh Supply Department Minister B Lalchhanzova te hriatpuinain, Social Welfare, Women & Child Development aiawhin Addl Secretary Lalnunhlua leh leh Food, Civil Supplies & Consumer Affairs Department aiawhin Secretary Teresy Vanlalhruaii ten thuthlung an ziak.
Thawhhona thuthlungah hian sorkar laipui dan zawma din Mizorama welfare institution, a bikin ruihhlo ngaite enkawlna de-addiction leh rehabilitation centre-te hnenah WI&HS kaltlangin man tlawm zawkin buhfai pek thin an ni dawn a ni.
Thawhhona thuthlung ziahna inkhawmah Social Welfare Minister Lalrinpuii chuan, thawhhona thuthling siam tura Supply Minister B Lalchhanzova’n hma a la chu fakawm a tih thu a sawi a. An thuthlung kaltlangin home leh centre-te an enkawlna kawngah nasa takin a puih tur thu a sawi.
Supply Minister B Lalchhanzova chuan welfare institution-te dawn tur buhfai chu thla ruk dana lo kal thin a nih avanga home leh centre tam tak an buai phah thin thu sawiin, hemi tihreh nan hian supply department chuan an buhfai chhekkhawl sa thla tin quota an pek chhuah tawh thin tur thu a sawi a. Hei hi central lam atanga WI buhfai lo thlen hunah siamrem mai thin a nih tur thu a sawi.
He hunah hian Council of Churches In Mizoram, MHIP hruaitute, ZPM Research Wing, Welfare Institution eng emaw zat bakah supply leh social welfare dept official te an tel a ni.
He huna tar lan a nih danin Mizoramah hian welfare institution 116, hostel 87, a vaiin 203 a awm mek a. Hengah hian mi 14,748 awm mekin an pual hian sorkar laipui atangin mi pakhat tan thla khatah buhfai kg 15, kg-a Rs 6 rate a dawn thin a ni.