Aizawl: Mizoram Remote Sensing Application Centre (MIRSAC)-in tunlai thiamna geospatial technology hmanga Mizoram chhunga leilet chhinchhiahna a hman mek leh la hman theih tur (potential area) ri chhinchhiahna, map leh report bu chu Agriculture & Farmers Welfare Department hnenah an hlan.
MIRSAC-in lei let awmsa leh la hman theih tur chhinchhiahna map leh report bu hi MIRSAC Member Secretary Er. H. Lalsawmliana chuan Agriculture Minister P.C. Vanlalruata hnenah nimin khan Aijal Club-ah a hlan.
Hlanna inkhawmah PC Vanlalruata chuan MIRSAC-in vansang thiamna hmanga Mizoram chhunga leilet a neihte tangkai zawka hman a nih theih nana zirchianna leh chhinchhiahna hman theih tur an buatsaih chu lawmawm a tih thu a sawi a. Mizopa technology, tuthlawh leh chempui ringa hun rei tak chhung Mizote an awm tawh hnua, geospatial technology hman tangkai a ni chu Mizoram tan hmasawnna lian tak a nih thu a sawi.
PC Vanlalruata chuan he report bu leh a chhunga map te hi sorkarin ei leh bar intodelhna tura a hmalak mekah buh leh bal tam zawk thar chhuah kawngah a tangkai dawn hle tih sawiin, sorkar department leh hemi lama hmalatu dangte chu a taka hmang tangkai turin a chah.
MIRSAC-in an zirchiannaah tun dinhmuna Mizorama Wet Rice Cultivation (WRC) zau zawng chu 7532.86 Hectare a ni.