Aizawl: Aizawl Police Station chuan nimin khan mobile phone bo an ziah luh, Central Equipment Identity Register (CEIR) app hmanga an chhuichhuahsak, May thla chhunga an hmuh let 12-te chu a neitute hnenah nimin khan an pe let.
Mobile phone bo hmuh let leh a neitute hnena hlanna inkhawm Aizawl PS Conference Hall a neihah, Aizawl Police Station Officer-in-Charge Lalnunmawia chuan April 2025 atang khan mobile phone bo, Aizawl Police Station a report-te chu CEIR app hmanga an chhui tan thu sawiin, nimin thleng khan mobile phone bo 33 chuang an hmuh let tawh thu a sawi.
Aizawl Police Station OC chuan, mobile phone tibo leh ruk sak tawkte chu police station-a report tura ngenin, chhuina kawngah theihtawp an lo chhuah pui tur thu a sawi a. Zaa za hmu let leh lo mah se, a tam zawk hmu let leh ngei tura tan an lo lakpui tur thu a sawi.
Mobile phone bo hmuh let leh 12 te hi Aizawl South SDPO H. Lalduata leh officer dangten a neitute hnenah an hlan a ni.