Ruihhloin nasa takin kan ram min run a, kan thalaite a nghaisa a, an dam chen tur aia tawi dam ta tam tak an awm ta. A pawi hle.
Tun hnaiah ruihhlo ngaite enkawlna hmun pakhat chu archuktuilo khawpa chhuahin, a awm zawng zawng deuh thaw chhuahtir an ni zui bawk a, chu’ng mite chuan pan lam tur pawh hre lovin khawlaia an ruang chhar tak hial pawh an awm bawk.
Ruihhlo leh a kaihhnawih hrim hrim hi a rem maiin a rinawm loh a, a la nasa zual zelin a rinawm zawk. Naupang zawkte atanga ti lo tura kan inchah leh inhrilh mawlh mawlh hi a tul hle. Zirna inah te hian zirlai atan nei hial se la, tihchhin tak ngial pawh chak loh rawihna khawpa kan inhrilh leh zirtir hi chu a ngai tawh a ni.
Ruihhloah pawh chi hrang hrang rawn awm chho zelin, a chhuak thar an siam zel a, vawikhat ruihna tur pawh cheng tam fe sen ngai a ni chho zel. Tu chhungkua mahin an tlin loh tur a nih miau avang hian a timekte pawhin an damdawi tih tur tuak nan ruk ruk mai loh chu kawng dang an hre lo a, a nghawng hi a thui hle.
Sorkar hian zirna in atanga tanin, naupang zawkte hnenah hian ruihhlo hlauhawmzia leh tihchhin pawizia hi sawi tam se la, tunhnaia a chhuak thar an tihte zinga thenkhat phei chu vawikhat tih man pawh sing chuangte nia sawi zu nia!
Kan hma hun hi a thim hle a, tun atanga thapui thawha ruihhlo hi kan do a ngai a ni. Khawtlang leh kohhrana mi challang tak takte inrawlhna khawvela awm nia an sawi tawh lehnghal a nih avang hian naupang zawkte atanga inzirtirna hi kan pek a va tul tawh em.