Aizawl: ZPM Thalai chuan MNF Thalai President Robert Romawia Royte in Zampui chhehvela chengte ration card atanga paihsak chungchangah thu dik lo sawiah an puhin, thu dik lo sawi tawh lo turin an chah.
Nimina thuchhuah an siamah ZPM Thalai chuan, Thawhtannia Mizo Hnam Run inkhawma MNYF President Robert Romawia Royte, Hachhek bialtu MLA-in Zampui chhehvel-a cheng khuate, ZPM kaihhruai sorkarin thla li chhung lekin, YMA President leh VC Secretary telin Mizoram ration card atanga paih anga mi 85 paih anga a sawi chu thudik lo a nih thu an sawi.
ZPM Thalai chuan MNF sorkar laia Tripura sorkarin Zampui chehvel (Phuldungsei)-a cheng te hnenah Aadhar authentigication, RCMS an lo ti hmasa zawk tih sawiin, “MNF sorkarah khan Mizo hnam rilru pu mi lo la awm chu nise, he thil hi Zampui tlangdung khaw hrang hranga mipuiten harsatna an tawk lo turah a ngai,” an ti.
Ram leh hnam rilru pu tlat, Supply Minister B. Lalchhanzova’n Mizoram khua leh tui humhim nan hma lain, chhungkaw 21-a mi 85 tan Manual Ration Card a pe nghal tih sawiin, thla tin AAY quota buhfai kg 35 chu chhungkaw 21 hnenah an pek ziah bakah, he’ng mi 85 te hi Tripura atanga inpaih tir tura ngen an nih thu an sawi bawk.
ZPM Thalai chuan Assembly Session-ah hemi chungchangah Robert Romawia Royte thu chu Supply Minister B. Lalchhanzova’n hawihawhawm leh mawihnai taka a senghawi fel tawh tih sawiin, thudik lo hmanga politics khelh hi kalphung thar hunah chuan Mizo mipui ten an kham tawh tih an sawi.